Batys Qazaqstanda 28 sý qoımasynyń 20-sy talapqa saı kelmeıdi
ORAL. KAZINFORM — Batys Qazaqstan oblysynda kommýnaldyq menshiktegi 28 gıdrotehnıkalyq qurylymnyń 20-sy qanaǵattanarlyqsyz dep tanyldy.
BQO tabıǵı resýrstar jáne tabıǵat paıdalanýdy retteý basqarmasynyń basshysy Marat Moldashevtiń óńirlik kommýnıkatsııalar alańynda ótken brıfıngte málim etkenindeı, qazirgi ýaqytta 14 sý qoımasyn rekonstrýktsııalaý úshin jobalyq-smetalyq qujattamalar daıyndalýda.
Marat Tóleǵalıulynyń sózine qaraǵanda, 2024 jyly oblystyq bıýdjetten Aqjaıyq aýdany Solıanka ózenindegi Aqjaıyq sý qoımasyn jáne Bókeı ordasyndaǵy Muratsaı sý qoımasyn rekonstrýktsııalaýǵa jobalyq-smetalyq qujattama daıyndaýǵa qarajat bólinip, kelisimshart jasaldy (jobalardyń jalpy quny — 55,8 mln teńge, 2024 jylǵa 2 mln teńge).
— Jalpy quny 431,722 mln teńgege Terekti aýdanyndaǵy 9 sý qoımasyn rekonstrýktsııalaýǵa jobalyq-smetalyq qujattama daıyndalýda. Jyl sońyna deıin memlekettik saraptama qorytyndysyn alý josparlanýda. Jobalaýshylar — «Ýralvodproekt» jáne «Teka-proekt» JShS. 8 sý qoımasynyń rekonstrýktsııasyna JSQ ázirleý kózdelgen, — deıdi M.Moldashev.
Onyń aıtýynsha, QR Prezıdentiniń tapsyrmasyn oryndaý maqsatynda oblysta gıdrotehnıkalyq qurylystardy paıdalaný jáne basqarý úshin «Batysırrıgatsııa» kommýnaldyq memlekettik mekemesi quryldy. Shtat sany 39 bolsa, kúni búginge deıin 19 adam jumysqa qabyldandy, sonyń ishinde aýdan ortalyqtarynda 6 ýchaske bastyǵy bar. 2024 jylǵa mekeme qyzmetine 36,824 mln teńge berildi.
— Qazirgi ýaqytta mekemege mamandardy jumysqa alý, materıaldyq-tehnıkalyq bazasyn nyǵaıtý jumystary júrgizilýde. Aýdandyq kommýnaldyq menshikten mekeme teńgerimine gıdrotehnıkalyq qurylymdardy tabystaý jumystary júrgizilýde. Osy kezge deıin Jánibek aýdanyndaǵy 11, Bórlidegi 3, Syrymdaǵy 1, Aqjaıyqtaǵy 18, barlyǵy 33 nysan mekeme teńgerimine berildi. Qalǵan aýdandarda, atap aıtsaq, Terekti, Jańaqala, Kaztalov, Shyńǵyrlaý, Bókeı ordasy, Báıterekte nysandardyń qujattaryn sáıkestendirý jumystary aıaqtalǵannan keıin mekeme teńgerimine qabyldanatyn bolady, — deıdi basqarma basshysy.
Onyń keltirgen málimetine qaraǵanda, 2024 jyly 58 mln teńgege 8 sý qoımasyna kópfaktorly zertteý jumystary júrgizilgen. 2025 jyly 9 sý qoımasyna kópfaktorly zertteý júrgizýge 102,270 mln teńge qarastyryldy.
Aqjaıyq aýdany Aznabaı-Taıpaq kanalyn rekonstrýktsııalaý jobasy aıasynda Aıaq sý qoımasyn qaıta qurý jumystary júrgizilýde (193,4 mln teńge).
Báıterek aýdany Malaıa Bykovka ózenindegi Chırov aýyly tusyndaǵy sý qoımasy bógetiniń rekonstrýktsııasyna 78,5 mln teńge bólindi, kelisimshart jasaldy (joba quny 156 mln teńge, merdiger — «SMÝ117» JShS).
Bókeı ordasy aýdany Muratsaı sý qoımasy bógetin aǵymdaǵy jóndeý jumystary aıaqtalýda (37 mln tenge).
— Bıyl kóktemgi sý tasqyny kezeńinde buzylǵan 6 nysandy aǵymdaǵy jóndeýge 382,3 mln teńge bólindi (Uzynkól — 151,8 mln teńge, Kemer — 92,6 mln teńge, Jańaómir — 81,8 mln teńge, Bórli aýdanyndaǵy Ýspen jáne Besaǵash). Demeýshiler esebinen Báıterek aýdany Shalǵaı aýylyndaǵy Fregat toǵanynda jóndeý jumystary aıaqtaldy. QR Premer-mınıstriniń orynbasary Qanat Bozymbaevtyń tapsyrmasyna sáıkes «Demeý Qazaqstan qory» korporatıvtik qorynan 2,9 mlrd teńgege 16 qorǵanys bógetin qalpyna keltirý jumystary júrgizilýde. Únemdelgen qarajat esebinen 99,1 mln teńgege Báıterek aýdanyndaǵy qosymsha 3 bóget retke keltiriletin bolady. Qorǵanys bógetteriniń jalpy uzyndyǵy — 37,1 km, — dedi M.Moldashev.
Eske sala keteıik, budan buryn Batys Qazaqstanda bıylǵydaı sý tasqyny qaıtalanýy múmkin be ekenin jazǵan bolatynbyz.