Batys Qazaqstanda 260 shaqyrym jergilikti joldardy jóndeý kózdelip otyr
ORAL. KAZINFORM – Batys Qazaqstan oblysynda bıyl jergilikti joldardy jóndeýge 44,2 mlrd teńge qarastyryldy.
BQO jolaýshylar kóligi jáne avtomobıl joldary basqarmasynyń basshysy Marat Qýanshalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, osy qarjyǵa 260,7 km jergilikti joldar jóndelmek.
Onyń sózine qaraǵanda, sonyń ishinde jalpy uzyndyǵy 221,5 km oblystyq (7 joba) jáne aýdandyq mańyzy bar (16 joba) avtojoldardy jóndeýge 38,9 mlrd teńge bólindi. Oǵan qosa «Aýyl – el besigi» baǵdarlamasy aıasynda 5,2 mlrd teńgege 15 eldi mekende 38,8 km aýylishilik joldarǵa asfaltbeton jabyny tóselmek.
- Jergilikti mańyzy bar avtomobıl joldaryn kútip ustaý da asa mańyzdy. Bul jumystarmen 37 merdiger uıym (oblystyq jolda – 8, aýdandarda – 29) aınalysady. Olardyń teńgeriminde 265 arnaıy tehnıka bar. Ótken jyly joldyń júris bóliginde 11 058 sharshy metr shuńqyr jabylyp, jol jıegine jańadan 737 jol belgisi ornatyldy. Qysqy ýaqytta jol jıeginde ósken terekter qardyń toqtaýyna sebep bolyp, jol júrisine kedergi keltiredi. Osyǵan oraı oblystyq mańyzy bar Oral-Kırsanov, Barbastaý-Aqjaıyq-Inderbor, Terekti-Aqsaı, Aqsaı-Prıýralnyı joldaryndaǵy terekterdi tamyrymen julýǵa 280 mln teńgege «Báıterek Jol Qurylys» JShS-men eki jylǵa kelisim-shart jasalyp, tıisti jumystar atqaryldy, - dedi M.Qýanshalıev.
Onyń aıtýynsha, 2024 jyly 34,8 mlrd teńgege 250,8 km jergilikti joldar jóndeldi. Sonymen qatar «Aýyl – el besigi» baǵdarlamasy aıasynda 8,8 mlrd teńgege 88 km aýylishilik joldar retke keltirildi.
Basqarma basshysy Kazinform tilshisiniń saýalyna oraı Jańaqala-Saıqyn jolynyń (307-337) qurylysynda ótken jyly qıyndyqtar bolǵanyn, bıyl jalǵasyp jatqanyn jetkizdi.
- Oblystyq mańyzy bar Algaı-Jalpaqtal-Juldyz-Qarasý jolyn salý da ózekti bolyp otyr. Qazirgi tańda Jalpaqtaldan Juldyzǵa jáne Jalpaqtaldan Aqpáterge qaraı jıyrma kılometrden eki joba daıyn. Qarajat tapshylyǵyna baılanysty jol qurylysy ázirge bastalmaı otyr. Kelesi jyly iske kirisemiz be dep otyrmyz, - dedi M.Qýanshalıev.
Eske sala keteıik, budan buryn Batys Qazaqstanda shalǵaı aýyldarǵa asfalt jol qashan salynatynyn jazǵan bolatynbyz.