Batys Qazaqstanda 25 sý qoımasy qanaǵattanarlyqsyz kúıde qalyp otyr
ORAL. KAZINFORM – Batys Qazaqstan oblysynda 50 gıdrotehnıkalyq qurylym bolsa, sonyń 14-i – «Qazsýshar», 25-i – kommýnaldyq menshikte aýyldyq okrýg ákimdikteri teńgeriminde.
BQO tabıǵı resýrstar jáne tabıǵat paıdalanýdy retteý basqarmasy basshysynyń orynbasary Darhan Zakarınniń óńirlik kommýnıkatsııalar qyzmeti alańynda ótken brıfıngide málim etkenindeı, sondaı-aq 4 gıdrotorap pen 1 bóget «Qazsýshar», 3 toǵan aýyldyq okrýg ákimdikteri, 3 toǵan jeke menshikke tıesili.
Darhan Ámirhanulynyń sózine qaraǵanda, kúni búgin 25 gıdrotehnıkalyq qurylym qanaǵatanarlyqsyz kúıde dep tanyldy.
— «Qazsýshar» teńgerimindegi Kırov sý qoımasyn rekonstrýktsııalaý jumysy 2025 jyly aıaqtalady. Ótken jyly Rybnyı Sokryl, Aıdarhan, Baǵyrlaı sý qoımalary jóndeýden ótkizildi. 2024 jyly kóp faktorly tekseris jumystary nátıjesinde respýblıkalyq menshiktegi Bitik, Dóńgelek, Pıatımar sý qoımasynyń jaǵdaıy qanaǵattanarlyqsyz dep tanyldy. Oǵan qosa 58 mln teńgege kommýnaldyq menshiktegi 8 sý qoımasyna osyndaı zertteý isi júrgizildi. Qazirgi ýaqytta 14 sý qoımasyn rekonstrýktsııalaýǵa jobalyq-smetalyq qujattama daıyndalýda, - deıdi D. Zakarın.
Onyń aıtýynsha, Jaıyq, Derkól, Shaǵan ózenderinde ornalasqan avtomobıl kópirlerine gıdrologııalyq qurylǵy negizinde sý tasqynyn habarlaý jáne monıtorıngi úshin keshendi júıe ornatýǵa kelisimshart jasaldy. Joba quny — 79,6 mln teńge.
— Bıyl 3 sý qoımasynda (Shaǵan, Kaztalov 1, Kaztalov 2) jóndeý jumystaryn júrgizý kózdelip otyr. Sondaı-aq respýblıkalyq menshiktegi 4 sý qoımasyn kóp faktorly tekseristen ótkizý josparlanýda. Sol sekildi kommýnaldyq menshiktegi 9 sý qoımasyna zertteý júrgizý úshin 102, 270 mln teńge bólingen bolatyn. Kúni búgin 6 nysan boıynsha memlekettik satyp alý aıaqtaldy, úsheýinde jalǵasýda. Sonymen qatar taǵy 8 sý qoımasyn rekonstrýktsııalaýǵa jobalyq-smetalyq qujattama ázirlenetin bolady, - dedi basqarma basshysynyń orynbasary.
Eske sala keteıik, budan buryn Batys Qazaqstanda 28 sý qoımasynyń 20-sy talapqa saı kelmeıtinin jazǵan bolatynbyz.