Batys Qazaqstanda 24 500-den astam adam jumyspen qamtyldy
ORAL. KAZINFORM — Batys Qazaqstan oblysynda eńbek naryǵyn damytýdyń 2024-2029 jyldarǵa arnalǵan tujyrymdamasy aıasynda naqty jumystar atqarylyp keledi.
BQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Asan Narymbaevtyń óńirlik kommýnıkatsııalar qyzmeti alańynda ótken brıfıngte málim etkenindeı, Ulttyq statıstıka bıýrosynyń málimetine sáıkes óńirde ekonomıkalyq turǵydan belsendi halyqtyń sany 356 845 bolsa, sonyń 250 669-y — jaldamaly qyzmetkerler, 89 262-si — ózin-ózi jumyspen qamtyǵandar, 16 914-i — jumyssyzdar.
Asan Maratulynyń sózine qaraǵanda, jalpy jumyssyzdyq deńgeıi — 4,7 paıyz, jastar — 3,6 paıyz, áıelder arasynda — 5,4, aýyl halqynda — 4,9 paıyz.
— Bıyl óńirde 113 jobany júzege asyrý nátıjesinde 24 506 (18 498-i — turaqty, 6 008-i — ýaqytsha) adam jumysqa ornalasty. Sonyń ishinde óńirlik karta aıasynda 108 jobany merdiger mekemelermen iske asyrý arqyly jospardaǵy 811-diń ornyna 884 adam eńbek ornyn tapty. Sóıtip jospar 109 paıyzǵa oryndaldy. Sondaı-aq «Halyqtyń árbir 10 myń adamyna 100 jańa jumys ornyn qurý» ındıkatory boıynsha jeke kásipkerlikter men sharýa qojalyqtary 7 537 jańa jumys ornyn ashty. Oǵan qosa 21 549 adam jumyspen qamtýdyń belsendi sharalaryna joldandy, — dedi Asan Narymbaev.
Onyń naqtylaýynsha, kásiptik oqytýmen barlyǵy 2 695 adam qamtyldy. Al kásipkerlik bastamaǵa járdemdesý baǵyty boıynsha 3 436 adam tartyldy. Sýbsıdııalanatyn jumys oryndaryna 5 290 adam joldandy. Sonymen qatar jumys berýshiler málimdegen bos jumys oryndaryna 10 125 adam ornalasty.
Basqarma málimeti boıynsha «Elektrondyq eńbek bırjasy» memlekettik aqparattyq portaly (www.enbek.kz) eńbek naryǵynyń biryńǵaı aqparattyq bazasyn qamtıdy. Respýblıka boıynsha bos jumys oryndar jáne izdenýshiler týraly aqparat kún saıyn jańartylady. Elektrondyq eńbek bırjasy (Enbek.kz) arqyly jumys izdep júrgen kez kelgen adam óziniń elektrondyq qoltańbasymen (ETsQ) «Jumys izdep júrgen adamdardy tirkeý» jáne «Jumyssyzdardy tirkeý» memlekettik qyzmeti proaktıvti túrde ala alady.
— Jumyssyzdardy tirkeý qyzmeti tolyq avtomattandyrylǵan. Júıe jumys izdeýshige laıyqty jumysty tańdaýǵa múmkindik beredi. Jumyssyz retinde tirkelgennen keıin azamattar elektrondyq eńbek bırjasy arqyly onlaın rejımde jumyssyz qalǵan jaǵdaıda tólenetin tólem alý úshin ótinim jibere alady. Oǵan qosa memleketten sýbsıdııalanatyn ýaqytsha jumys oryndaryn — jastar praktıkasy, áleýmettik jumys oryndary, qoǵamdyq jumystaǵy bos jumys oryndaryn qarap, jumys berýshilerge óz túıindemesin jibere alady, — dedi basqarma basshysynyń orynbasary.
Eske sala keteıik, budan buryn Batys Qazaqstan oblysyna qandastardyń kópshiligi Reseıden kóship kelgenin jazǵan edik.