Batys Qazaqstanda 200-den astam mal qyrylyp qaldy
ORAL. KAZINFORM — Batys Qazaqstan oblysynda Bókeı ordasy, Jánibek, Jańaqala jáne Kaztalov aýdandarynda iri qara arasynda mal aýrýy tirkelip otyr.
BQO veterınarııa basqarmasynyń basshysy Abzal Bralıevtiń óńirlik kommýnıkatsııalar qyzmeti alańynda ótken brıfıngte málim etkenindeı, 22 aýyldyq okrýgte (130 sharýa qojalyǵy, 69 jeke tulǵa) veterınarııalyq mamandarmen aýrý janýarlarǵa emdeý is-sharalary júrgizilýde.
Abzal Serikulynyń sózine qaraǵanda, aýrý kıik júretin jerlerden shyǵyp otyr. 22 aýyldyq okrýgte 40 myńnan astam iri qara bolsa, 5 484 basynan nemese 15 paıyzynan aýrý belgileri anyqtaldy. Kúni búginge deıin sonyń 3 732-si nemese 68 paıyzy emdelip jazyldy.
- Emdeý is-sharalaryn júrgizýge veterınarlyq stantsııa mamandaryna sharýa qojalyqtarynyń ózderi de kómektesýde. Ókinishke qaraı, aýrý saldarynan 217 bas iri qara ólim-jitimge ushyrasa, sonyń 189-y – buzaý. 11 qoı bar. Ólimniń sebepteri ár túrli, tek aýrýǵa baılanysty dep aıtýǵa bolmaıdy. Synama alynǵanmen, qorytyndysy ázirge kelgen joq. Sonymen qatar qystan nashar shyqqan, kóterem maldar da ólip jatyr. Oǵan qosa buzaýlardy soıǵyzyp qaraǵanda, keıbireýiniń ishinen paket, jip shyqty, - dedi A.Bralıev.
Basqarma basshysynyń aıtýynsha, bıyl oblys boıynsha maldy 12 asa qaýipti aýrýǵa (sibir jarasy, qarasan, pasterellez, aýsyl, qutyrý, nodýlıarly dermatıt, mańqa, túıe obasy, usaq maldyń kúl aýrýy, joǵary patogendi qus tumaýy, týberkýlez) qarsy vaktsınatsııalaý josparlanǵan. Onyń ishinde sibir jarasy, aýsyl aýrýlaryna qarsy túgeldeı egiledi. Sondaı-aq qazirgi ýaqytta kıik arasynda pasterellez aýrýynyń tirkelýine baılanysty ońtústik aýdandardyń aýyl sharýashylyǵy janýarlaryn osy dertke qarsy 100 paıyz egý kózdelýde.
- Qazirgi tańda oblysqa QR AShM Veterınarııalyq baqylaý jáne qadaǵalaý komıteti tarapynan 4,5 mln doza veterınarııalyq preparattar jetkizildi. Kúni búginge bekitilgen josparǵa sáıkes oblys boıynsha 3,2 mln bas mal vaktsınatsııalandy. Onyń ishinde 421 334 bas mal sibir jarasyna, 1 mln 822,921 myńy aýsyl, 220 myń 901-i pasterellez aýrýyna qarsy egildi, - dep qosty A.Bralıev.
Eske sala keteıik, budan buryn Batys Qazaqstanda maldyń arasynda juqpaly aýrý tirkeldi me, sony jazǵan bolatynbyz.
Sondaı-aq Batys Qazaqstanda kıikten pasterellez aýrýy anyqtaldy.