Batys Qazaqstanda 2 myńdaı adamdy ıt pen mysyq tistegen

ORAL. KAZINFORM — Batys Qazaqstan oblysynda janýarlar tistep, tyrnaǵan jáne silekeıi tıgen 2 090 adam medıtsınalyq kómekke júgindi. 

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń Kazinform tilshisine málim etkenindeı, ótken jyldyń toǵyz aıymen (1 959) salystyrǵanda, jaraqat alǵandar sany 131-ge ósken. 

— Sonyń ishinde 1 434 adamdy ıt qapsa, 563-in mysyq tistegen. Oǵan qosa beseýi jylqy, 12-si iri qara, 76 adam basqa janýarlardan zardap shekken. Oblysta adamdar arasynda qutyrma aýrýy tirkelgen joq, — dedi N.Mustaev.

BQO veterınarııa basqarmasynyń basshysy Abzal Bralıevtiń aıtýynsha, jyl basynan beri 5 371 buralqy ıt pen mysyq aýlanǵan. Sonyń ishinde 2 438-i bıosterılızatsııadan keıin mekendeý ortasyna keri jiberilse, 2 933-i turǵyndardyń ótinishteri negizinde jansyzdandyryldy. 

— Qazirgi tańda derekqorda oblys boıynsha 27 642 ıt pen mysyq tirkelse, sonyń 6 545-iniń ıesi bar. Toǵyz aıdyń qorytyndysy boıynsha janýarlardy kútip ustaý jáne serýendetý qaǵıdalaryn buzǵany úshin jergilikti polıtsııa qyzmetkerlerimen 175 ákimshilik hattama toltyrylyp, 3,6 mln teńge aıyppul salyndy, — dep qosty A.Bralıev.

Eske sala keteıik, budan buryn BQO-da ıt qapqan 760-qa jýyq adamnyń medıtsınalyq kómekke júgingenin jazǵan edik.