Batys Qazaqstanda 2 200-ge jýyq qyzmetkerdiń eńbek quqyǵy qorǵaldy

ORAL. KAZINFORM — Batys Qazaqstan oblysynda Tasqala aýdany prokýratýrasy taldaý júrgizip, 2 180 áleýmettik sala qyzmetkeriniń, onyń ishinde muǵalimderdiń, dárigerlerdiń jáne basqa da mamandardyń eńbek quqyqtaryn qorǵaý úshin sharalar qabyldady.

BQO prokýratýrasynyń baspasóz qyzmetinen málim etkenindeı, ujymdyq kelisim-sharttardy taldaý barysynda áleýmettik demalys jáne basqa da áleýmettik kepildikter berý sharttary tıisti túrde eskerilmegeni anyqtaldy.

Bul eńbek zańnamasyn buzý bolyp esepteledi. 

Atalǵan zań buzýshylyq jumysshylardyń demalý quqyǵyna shekteý qoıyp, eńbek jaǵdaılarynyń nasharlaý qaýpin týdyrdy.

Prokýratýra qadaǵalaý aktisin tıisti mekemelerdiń basshylaryna joldaý arqyly jedel áreket etti.

— Prokýratýranyń aralasýy nátıjesinde ujymdyq sharttar zań talaptaryna sáıkes keltirildi, al qyzmetkerler úshin barlyq tıisti áleýmettik demalystar men jeńildikter qamtamasyz etildi. Qabyldanǵan sharalar qyzmetkerlerdiń buzylǵan quqyqtaryn qalpyna keltirýge jáne bolýy múmkin buzýshylyqtardyń aldyn alýǵa múmkindik berdi, — dep habarlady vedomstvodan.

Eske sala keteıik, budan buryn BQO-da dropperdiń 4,8 mln teńgeniń qoldy bolýyna járdemdeskenin jazǵan edik.