Batys Qazaqstanda 2 100-den astam áıel sút bezi obyrymen esepte tur

BQO onkologııalyq dıspanseriniń hırýrg-onkologi, mammolog dáriger Taıman Amanovtyń málim etkenindeı, Dúnıejúzilik densaýlyq saqtaý uıymynyń málimetine qaraǵanda, 2024 jyly álemde 2,4 mln áıelge sút bezi obyry dıagnozy qoıylsa, 694 myńdaıy osy dertten kóz jumdy.

Taıman Tóleýǵalıulynyń sózine qaraǵanda, BQO-da 2021 jyly — 189, 2022 jyly — 213, 2023 jyly — 198, 2024 jyly — 197, ótken jyly 173 atalmysh aýrý tirkeldi. 2026 jylǵy 1 qańtardaǵy málimet boıynsha oblystyq onkologııalyq dıspanserinde osy dıagnozben 2 131 áıel esepte turdy. 

— Bıyl segiz aıdaǵy 140 sút bezi obyrynyń 60-y skrınıng nátıjesinde belgili boldy. Bul aýrýdy erte anyqtap, ýaqytyly emdeýde profılaktıkalyq tekserýdiń mańyzy zor ekendigin kórsetedi. Oblysta skrınıngten ótetin áıelder sany artyp keledi. Aıtalyq, 2023 jyly — 39 399, 2024 jyly — 42 367, 2025 jyly 44 919 áıel tekserýden ótkizildi. Eki jyl ishinde dáriger aldynan ótkender sany 14 paıyzǵa kóbeıdi, — deıdi Taıman Amanov. 

Onyń aıtýynsha, skrınıng nátıjesinde 2023 jáne 2024 jyldardyń árqaısysynda 89, 2025 jyly 68 sút bezi obyry anyqtaldy. Sonyń ishinde 2023 jyly — 52, 2024 jyly — 48, 2025 jyly 46 áıel aýrýdyń birinshi satysynda bolǵan. Ótken jyly munyń úlesi 67,6 paıyzǵa jetti. Bul skrınıng barysynda atalǵan dıagnoz qoıylǵan ár úsh áıeldiń ekeýinde aýrý birinshi satyda bolǵandyǵyn bildiredi. 

— Qazaqstanda sút bezi obyryn erte anyqtaý úshin skrınıng turǵylyqty jeri boıynsha emhanalarda tegin júrgiziledi. Ol 40-tan 76 jasqa deıingi áıelder úshin eki jylda bir ret ótkiziledi. Mammografııalyq tekserý negizgi zertteý bolyp sanalady. Densaýlyǵyna shaǵymdanbasa da, sol adamnyń skrınıngten ótkeni jón. Eger qosymsha tekserý qajet bolsa, ony da aıaqtaǵan abzal. Omyraýdyń tyǵyzdalýy, onyń pishininiń ózgerýi, ózgeshe nemese qandy bólinýler baıqalsa, dárigerge dereý qaralý qajet, — dedi mammolog dáriger.

Eske sala keteıik, budan buryn Batys Qazaqstanda 30-dan astam adamnyń tumaýmen aýyrǵany rastalǵanyn jazǵan edik.