Batys Qazaqstanda 171 myń gektar alqapqa jazdyq daqyldar egildi

ORAL. KAZINFORM – Batys Qazaqstan oblysynda bıyl 613 myń gektarǵa aýyl sharýashylyǵy daqyldary egiletin bolady.

BQO aýyl sharýashylyǵy basqarmasynyń basshysy Jasulan Halıýllınniń óńirlik kommýnıkatsııalar qyzmeti alańynda ótken brıfıngide málim etkenindeı, 291 myń gektarǵa nemese 47,5 paıyzǵa dándi daqyldar (sonyń ishinde 92 myńy – kúzdik), 119 myń gektarǵa (19,4 paıyz) maıly daqyldar, 4,2 myń gektarǵa (0,7 paıyz) kartop, kókónis-baqsha, 119 myń gektarǵa (32,4 paıyz) mal azyqtyq daqyldar ósiriledi. 

Jasulan Joldybaıulynyń sózine qaraǵanda, kóktemgi egiske qajetti tuqymdar men tehnıkalar tolyq daıyndaldy.

Kúni búginge deıin 462 myń gektar egistik alqabynyń ylǵaly jabylyp, jumys 100 paıyz atqaryldy. 167 myń gektarǵa (jospar – 185 myń, 92 paıyz) kýltıvatsııalaý júrgizildi. 

- Osy ýaqytqa deıin 171 myń gektarǵa (45,8 paıyz) jazdyq daqyldar, sonyń ishinde 101 myńyna (50,5 paıyz) dándi daqyldar, 51 myńyna (43 paıyz) maıly daqyldar jáne 19 myń gektarǵa mal azyqtyq daqyldar (37 paıyz) egildi. Budan bólek, 660 gektarǵa kartop, kókónis-baqsha daqyldary (15,8 paıyz) otyrǵyzyldy. Egý jumystary jalǵasýda, - deıdi J.Halıýllın. 

Onyń aıtýynsha, kóktemgi dalalyq jumystardy júrgizýge 8,4 myń tonna dızel otyny bólinip, kestege sáıkes 4,5 myń tonnasy (53,6 paıyzy) Atyraý munaı óńdeý zaýytynan alyndy.

Atyraý munaı óńdeý zaýytynan tasymaldaýshy operator - «Petro Retail» JShS, Oral qalasyndaǵy munaı bazalarynan jiberý baǵasy lıtrine 254 teńgeden keledi. 

- Kóktemgi egis pen egin orý jumystaryna dıqandardy barlyq qajetti resýrstarmen qamtamasyz etý maqsatynda bıyl ósimdik sharýashylyǵyn sýbsıdııalaý men qyzmetter kórsetýge jergilikti bıýdjetten 2,6 mlrd teńge (sonyń ishinde – 1,9 mlrd teńge sýbsıdııa) qarastyryldy. Oǵan qosa osy maqsatqa nesıeleýge oblysqa 22,0 mlrd teńge bólindi. Búginde sharýalarǵa 5 paıyzben 7,2 mlrd teńge (33 paıyz) nesıe berildi, bunyń syrtynda 2,1 mlrd teńgege jýyq nesıeniń ótinimderi qaralýda. Ótinimderdi qabyldaý jalǵasýda. «QazAgroQarjy» AQ arqyly jalpy somasy 4,9 mlrd teńgege (39,2 paıyz) 529 tehnıka lızıngke alyndy (josparlanǵany – 12,5 mlrd teńge), - dedi basqarma basshysy.

Eske sala keteıik, budan buryn BQO-da kóktemgi dala jumystaryn qarjylandyrýǵa 10,9 mlrd teńge jumsalatynyn jazǵan edik.