Batys Qazaqstanda 17 mekteptiń qurylysy júrgizilmek

ORAL. KAZINFORM – Batys Qazaqstan oblysynda bıyl 17 mekteptiń qurylysy júrgizilmek.

BQO Qurylys basqarmasy basshysynyń orynbasary Álııa Qabenovanyń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde «Jaıly mektep» ulttyq jobasy aıasynda 6 mektep qurylysy ótken jyly bastalǵan bolatyn.

Sondaı-aq óńirde bilim berý ınfraqurylymyn qoldaý qory esebinen Oral qalasynda № 8 mektep, aýyldarda «QPO b.v.» kompanııasy qarajatyna 60 jáne 108 oryndyq 10 shaǵyn jınaqty bilim ordasy boı kóteretin bolady.

Álııa Qaıdarqyzynyń sózine qaraǵanda, densaýlyq saqtaý salasynda Aqjaıyq, Báıterek, Bórli, Jańaqala, Jánibek, Syrym aýdandarynda 14 medıtsınalyq nysannyń qurylysy jyl sońyna deıin aıaqtalady. Sol sekildi sport salasynda 2025 jyly «QPO b.v.» kompanııasynyń qarjysy esebinen Jánibek, Bókeı ordasy, Qaratóbe, Bórli aýdandarynda 4 mádenı-sport kesheni, Báıterek pen Terektide 2 dene shynyqtyrý-saýyqtyrý kesheni, Bórlide 2 sport zal salynady.

Mádenıet salasy da nazardan tys qalmaıdy. «Aýyl – el besigi» ulttyq jobasy aıasynda Aqjaıyq, Báıterek, Syrym, Jánibek aýdandarynda 7 mádenıet nysany turǵyzylmaqshy. Oǵan qosa «QPO b.v.» kompanııasy qarajatyna Báıterek aýdanynda 1 aýyldyq klýb qurylysy josparlanyp otyr.

- Ótken jyly basqarmaǵa barlyq bıýdjet qarajaty esebinen 87,1 mlrd teńge bólinse, sonyń 34,5 mlrd teńgesi áleýmettik sala nysandaryn salýǵa jumsaldy. Bıyl 38 mlrd teńgeniń 19,8 mıllıardy osyndaı nysandar qurylysyna baǵyttalmaqshy. Jalpy, sońǵy bes jylda Batys Qazaqstan oblysynda 100-den astam áleýmettik sala nysany paıdalanýǵa berildi, - dedi Á.Qabenova.

Eske sala keteıik, budan buryn Oralda «Aqjaıyq» shaǵynaýdany qalaı salynyp jatqanyn jazǵan edik.