Batys Qazaqstanda 16 myńǵa jýyq adam JRVI-men syrqattandy
ORAL. KAZINFORM — Batys Qazaqstan oblysynda jiti respıratorlyq vırýstyq ınfektsııalar (JRVI) men tumaýmen syrqattanýshylyqqa baılanysty jańa 2025-2026 jylǵy epıdemıologııalyq maýsym bıylǵy 1 qazannan bastaldy.
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń málim etkenindeı, sodan beri bir aıdan astam ýaqyt ishinde 15 973 adamnyń JRVI-men aýyrǵany tirkeldi. Sonyń 8 245-i – 14 jasqa deıingi balalar.
Onyń sózine qaraǵanda, sonymen qatar Oral qalasynda bir adamnyń tumaýǵa (A/(H3N2) tıpti vırýsy) shaldyqqany anyqtaldy.
- Epıdemıologııalyq jáne zerthanalyq málimetterdi eskere otyryp, 2025-2026 jylǵy epıdemııalyq maýsymǵa oraı Reseı Federatsııasynda óndirilgen tumaýǵa qarsy «Grıppol+» vaktsınasynyń 60 myń dozasy satyp alynyp, tolyǵymen jasaldy. Tumaýǵa qarsy egý ambýlatorııalyq-emhanalyq kómek kórsetetin barlyq medıtsınalyq mekemede 25 qyrkúıekten bastalǵan bolatyn. Aldymen táýekel tobyna jatatyn adamdar ekpe aldy. Bıyl tumaýǵa qarsy aqyly túrde vaktsınatsııa júrgizilgen joq, - dedi N.Mustaev.
Eske sala keteıik, budan buryn Batys Qazaqstanda 49 myńǵa jýyq adamnyń tumaýǵa qarsy ekpe alǵanyn jazǵan edik.
Sondaı-aq dáriger balalardy vaktsınatsııadan der kezinde ótkizýdiń mańyzy zor ekendigin aıtty.