Batys Qazaqstanda 15 sý qoımasynyń jaǵdaıy talapqa saı bolmaı shyqty
ORAL. KAZINFORM — Batys Qazaqstan oblysynda sý sharýashylyǵynda QR Úkimetiniń qoldaýymen birqatar jobalar júzege asyrylýda.
BQO tabıǵı resýrstar jáne tabıǵat paıdalanýdy retteý basqarmasynyń basshysy Marat Moldashevtiń óńirlik kommýnıkatsııalar qyzmeti alańynda ótken brıfıngte málim etkenindeı, 2021 jyldan beri jobalyq quny 2,6 mlrd teńgeni quraıtyn Kırov sý qoımasyn rekonstrýktsııalaý jumystary jalǵasýda.
Onyń sózine qaraǵanda, bıyl aıaqtalýy josparlanǵan jobaǵa 1 mlrd 252 mln teńge bólindi. 2023 jyly Qaraózen men Saryózenge 166 mln tekshe metr, Jánibek sýarý-sýlandyrý juıesine 30 mln tekshe metr Edil sýyn tasymaldaý shyǵyndary óteldi. Bul maqsatqa ótken jyly respýblıkalyq bıýdjetten 6,3 mlrd teńge jumsalsa, bıyl 5,1 mlrd teńge qaralyp otyr.
«Jyl basynan beri oblystyń bas ózeni – Jaıyqtan Jaıyq-Kóshim sýarý-sýlandyrý júıesine 599 mln tekshe metr sý kirdi. Іri kaskadty tórt sý qoımasy (Kırov, Bitik, Dóńgelek, Pıatımar) ortasha eseppen 87 paıyzǵa toldy. Jaıyqtan Jaıyq-Kóshim júıesine barynsha sý alý úshin jobanyń quny 2,6 mlrd teńgeni quraıtyn Shaǵan arnasy (46,8 km) men Kóshim kanalyn (22 km) mehanıkalandyrylǵan tazartý jumystary jalǵasýda. 2023 jyly 473 mln teńge ıgerilse, bıyl 1 mlrd teńge qarastyrylǵan. Jaıyq ózeniniń sol jaǵalaýyn sýlandyrý jáne sýmen qamtý maqsatynda Aşy-Aznabaı-Taıpaq kanalyn (66,4 km) rekonstrýktsııalaý jumystary aıaqtaldy», deıdi M.Moldashev.
Basqarma basshysynyń aıtýynsha, Terekti aýdanynda Jaıyq ózeninen sý jetkizý úshin Jaıyq-Shalqar kanalyn rekonstrýktsııalaýǵa (joba quny – 4,8 mlrd teńge) oblystyq qazynadan 476,2 mln teńge berilip, jumystary júrgizilip jatyr.
Bórli aýdany Jarsýat aýyly tusynda Jaıyq ózeniniń jaǵalaýyn bekitýge respýblıkalyq bıýdjetten 1,6 mlrd teńge, oblystan 187 mln teńge qaralyp, joba máresine jetti.
«Bıyl 28 mln tekshe metr sý jınaýǵa múmkindik beretin Jalpaqtal sý qoımasynyń qurylysy úshin jobalyq-smetalyq qujattama daıyndalýda. Oblys aýmaǵynda 39 sý qoımasy, 6 toǵan, 1 bóget, 4 sý torabynan turatyn 50 gıdrotehnıkalyq qurylys esepke alynǵan, onyń ishinde respýblıkalyq menshikte – 19, kommýnaldyq – 28, jeke menshiktegisi – 3», deıdi M.Moldashev.
Onyń málimdeýinshe, QR Aýyl sharýashylyǵy mınıstriniń «Sý sharýashylyǵy júıeleri men qurylystarynyń qaýipsizdigin qamtamasyz etý qaǵıdalaryn bekitý týraly» buıryǵyna sáıkes sý sharýashylyǵy júıeleri men qurylystarynyń ıesi nemese paıdalanýshy tulǵa 25 jyldan artyq paıdalanýda bolǵan sý sharýashylyǵy júıeleri men qurylystaryn, olardyń jaı-kúıine qaramastan, jyl saıyn kóp faktorly tekserýden ótkizedi. Al 25 jylǵa deıin paıdalanýda bolǵan sý sharýashylyǵy júıeleri men qurylystaryn 5 jylda bir ret kóp faktorly tekserýden ótkizýge mindetti.
«Ótken jyly 4 sý qoımasyna kóp faktorly zertteý jumystary júrgizildi. Gıdrotehnıkalyq qurylymdarǵa júrgizilgen kózben sholý jáne kóp faktorly zertteý jumystary negizinde kommýnaldyq menshiktegi 15 sý qoımasynyń qanaǵattanarlyqsyz jaǵdaıda ekeni anyqtalyp otyr. Bıyl 11 sý qoımasyna kóp faktorly zertteý jumystaryn júrgizýge oblystyq bıýdjetten 85,7 mln teńge bólindi», deıdi basqarma basshysy.
2024 jylǵy 30 qańtarda QR Úkimeti 2024-2030 jyldarǵa arnalǵan Qazaqstan Respýblıkasynyń sý resýrstaryn basqarý júıesin damytýdyń tujyrymdamasyn bekitti. Tujyrymdamany iske asyrý boıynsha bekitilgen is-sharalar josparyna sáıkes Sý resýrstary men ırrıgatsııa mınıstri jáne oblys ákimimen óńirdiń sýarý júıelerin qalpyna keltirý boıynsha jol kartasy bekitildi. Jol qartasy 7 baǵytta daıyndalyp, jalpy quny 120 mlrd teńgeden astam 84 is-sharany júzege asyrýǵa baǵyttalǵan.
«Memleket basshysynyń tapsyrmasyn oryndaý maqsatynda oblys ákimdiginiń 2024 jylǵy 6 mamyrdaǵy №106 qaýlysymen basqarmanyń «Batysırrıgatsııa» kommýnaldyq memlekettik mekemesi quryldy. Mekeme kommýnaldyq menshiktegi gıdrotehnıkalyq qurylymdardy kútip ustaý, olardy paıdalanýmen aınalysady», dep túıindedi sózin M.Moldashev.
Eske sala keteıik, budan buryn Batys Qazaqstan oblysynda jańadan sý qoımalary qashan salynatynyn jazǵan edik.
