Batys Qazaqstanda 15 myńǵa jýyq saıajaı ýchaskesi sýǵa ketti

ORAL. KAZINFORM — Batys Qazaqstan oblysynda 14 839 saıajaı ýchaskesin tasqyn sý basty. Oblys ákiminiń orynbasary Tilepbergen Kaıýpovtyń aıtýynsha, sonyń ishinde 14 466-sy – Oral qalasynda, 112-si – Báıterek, 245-i – Bórli, 16-sy Terekti aýdanynda ornalasqan.

Onyń sózine qaraǵanda, qazirgi tańda saıajaı turǵyndaryna keltirilgen zalaldy óteý ózekti máselelerdiń biri bolyp otyr.

Úıi sýǵa ketken saıajaı turǵyndaryna birjolǵy (100 AEK kóleminde) áleýmettik kómek kórsetilýde. Olar evakýatsııalyq pýnktterge ornalastyryldy.

Oblys ákiminiń orynbasary málim etkenindeı, zardap shekken turǵyndar Oral qalasy ákimdiginiń resmı saıtynda kórsetilgen mekenjaılarǵa jáne E-Gov-Mobaıl mobıldi qosymshasy arqyly ótinish qaldyra alady. Kúni búgin múmkindigine qaraı sýǵa ketken úılerge tehnıkalyq tekseris jumystary júrgizilýde.

«Qazirgi tańda ákimshilik-aýmaqtyq birlik aýmaǵynda tótenshe jaǵdaı jarııalanǵan kezde QR aýmaǵynda menshik quqyǵynda basqa turǵyn úıi joq menshik ıeleri úshin qıraǵan nemese ýaqytsha (maýsymdyq) turýǵa jaramsyz qurylystardy turǵyn úıge jatqyzý boıynsha zańǵa ózgeris engizý jóninde ereje jobasy ázirlenýde. Osy rette atalǵan shyǵyndardy óteý boıynsha sharalar turǵyndardyń turǵyn úı jaǵdaıyn jaqsartý maqsatynda emes, tótenshe jaǵdaı saldaryn joıý bolyp tabylatyndyǵyn eskerý qajet», - dedi T.Kaıýpov.

Onyń atap ótkenindeı, saıajaı úıi bir ǵana baspanasy bolǵanda ǵana turǵyndarǵa úı beriledi. Jańa úılerdiń alańy qansha adam bolsa da, 80 sharshy metrden, quny 22 mln teńgeden aspaıdy. Jańa úı alǵan turǵyndar saıajaı ýchaskelerin memleket menshigine tapsyrady. Jerler orman qoryna berilip, ol aýmaqtarda qaýipsizdik maqsatynda turǵyn úı salynbaıdy.

Eske sala keteıik, budan buryn Oralda saıajaıdan qutqarylǵan ıtterdiń qaıda ornalastyrylǵanyn jazǵan bolatynbyz.

Batys Qazaqstanda turýǵa jaramsyz dep tanylǵan 400-ge jýyq úı qaıta salynady.