Batys Qazaqstanda 140-tan astam adam jiti ishek juqpalarymen aýyrǵan
ORAL. KAZINFORM — Batys Qazaqstan oblysynda bıylǵy úsh aıda 143 adamnyń jiti ishek ınfektsııalarymen aýyrǵany tirkeldi.
BQO sanıtarııalyq-epıdemıologııalyq baqylaý departamentiniń baspasóz mamany Kenjegúl Muhıtovanyń málim etkenindeı, bul ótken jyldyń osy kezeńimen (120) salystyrǵanda, 19,6 paıyzǵa kóbeıip ketip otyr.
Onyń sózine qaraǵanda, sonyń 108-i — 14 jasqa deıingi balalar. Naqtylanǵan ishek juqpalary — 134 (104-i — 14 jasqa deıingi balalar). 8 ishek juqpasy (tórteýi — 14 jasqa deıingiler) naqtylanbaǵan.
Sondaı-aq bıylǵy úsh aıda bir adam dızenterııamen (ótken jyly osy merzimde — 3) syrqattanǵan.
— Jiti ishek ınfektsııalary — ártúrli bakterııalar, vırýstar nemese qarapaıym parazıtter týdyratyn jáne ıntoksıkatsııa, ishtiń aýyrýy, dıareıa jáne qusýmen birge júretin asqazan-ishek joldarynyń aýrýlary. Dıareıadan, qusýdan jáne ishtiń aýyrsynýynan basqa, atalmysh aýrý belgilerine temperatýranyń joǵarylaýy, álsizdik, júrek aıný, tábettiń bolmaýy jáne keıbir jaǵdaılarda degıdratatsııa jatady, — dedi K.Muhıtova.
Mamannyń aıtýynsha, atalmysh dert fekaldy-oraldy jolmen, ıaǵnı lastanǵan taǵamdy nemese sýdy tutyný arqyly jáne naýqas adammen baılanys arqyly beriledi. Sondyqtan jeke bas gıgıenasynyń qarapaıym erejelerin saqtaý bul ınfektsııadan qorǵanýǵa kómektesedi.
Іshek juqpasy jyldyń kez kelgen ýaqytynda paıda bolýy múmkin, biraq onyń shyrqaý shegi jazǵy maýsymǵa keledi. Jazda aýa raıynyń ystyq bolýyna baılanysty dızenterııa, salmonellez, ish súzegi jáne tyrysqaq sııaqty bakterııalyq ınfektsııalar jıi kezdesedi.
Jazǵy kezeńde jiti ishek ınfektsııalarynyń aldyn alý úshin jeke gıgıena erejelerin saqtaý, tamaqtanar aldynda, dárethanaǵa, kóshege jáne qoǵamdyq oryndarǵa barǵannan keıin qoldy sabynmen muqııat jýý qajet. Tek qaınatylǵan nemese bótelkedegi sýdy, taza taǵamdardy tutynyp, basqa da qaýipsizdik talaptaryn saqtaý kerek. Shomylý kezindegi erejelerdi umytpaǵan abzal.
— Aýrýdyń alǵashqy belgileri paıda bolǵan jaǵdaıda dereý dárigerdiń kómegine júginý jáne ózin-ózi emdemeý mańyzdy. Jedel ishek ınfektsııasy, ásirese, balalar men qart adamdardyń densaýlyǵy úshin qaýipti. Sondyqtan aldyn alý sharalaryn este ustaǵan jón, — dep qosty K.Muhıtova.
Eske sala keteıik, budan buryn Batys Qazaqstanda 70-ten astam adamnyń týberkýlezge shaldyqqany týraly jazǵan bolatynbyz.
