Batys Qazaqstanda 130 jasóspirim polıtsııaǵa jetkizildi

ORAL. KAZINFORM — Kámeletke tolmaǵandardyń quqyq buzýshylyqtarynyń aldyn alý, olardyń quqyqtary men zańdy múddelerin qorǵaý maqsatynda BQO aýmaǵynda 29 jeltoqsan – 7 qańtar aralyǵynda «Demalys» jedel-aldyn alý is-sharasy ótkizildi.

BQO polıtsııa departamentiniń baspasóz qyzmeti habarlaǵandaı, osy merzimde 130 jasóspirim ishki ister organdaryna jetkizilgen. 

Sonyń ishinde 126-sy ákimshilik quqyq buzýshylyq áreketterge barǵan. Tórteýi qaraýsyz jáne beıbereket júrgen. Kámeletke tolmaǵandardyń úsheýi beıimdeý ortalyǵyna ornalastyryldy.

— Іs-shara barysynda barlyǵy 205 ákimshilik quqyq buzýshylyq anyqtaldy. Sonyń 15-i ata-analardyń nemese zańdy ókilderdiń tárbıelik mindetterin oryndamaýy bolsa, 8 jasóspirim túngi ýaqytta oıyn-saýyq oryndarynda qydyrǵan. 5 adam alkogol ónimderin satý talaptaryn buzǵan. Ekeýi alkogoldik ishimdikterdi ishken nemese qoǵamdyq oryndarda mas bolǵan. 176 jasóspirim túngi ýaqytta zańdy ókilsiz nemese turǵynjaıdan tys jerde júrgen. Áleýmettik jaǵdaıy nashar 5 otbasy profılaktıkalyq esepke qoıyldy. Buryn osyndaı esepte turǵan 235 otbasy jáne tizimdik eseptegi 155 kámeletke tolmaǵan tekserildi, — dep habarlady vedomstvodan.

Eske sala keteıik, budan buryn BQO-da jańajyldyq merekelerge qatysty 362 nysan esepke alynǵanyn jazǵan edik.