Batys Qazaqstanda 13 jedel járdem kóliginiń qujatsyz júrgeni anyqtaldy
ORAL. KAZINFORM — Batys Qazaqstan oblysy Jánibek aýdanynda 13 jedel járdem kóligi qujatsyz júrgen.
Jánibek aýdanynyń prokýratýrasy aýdandyq aýrýhanada zańdylyqtyń jaı-kúıine taldaý júrgizgen kezde 10 kóliktiń jaramdylyq merzimi ótip ketken tehnıkalyq tekserý týraly sertıfıkattarmen, taǵy úsheýiniń mindetti saqtandyrý polısinsiz júrgeni anyqtaldy.
BQO prokýratýrasynyń baspasóz qyzmetinen málim etkenindeı, atalǵan jaǵdaı medıtsına qyzmetkerleriniń, naýqastardyń jáne turǵyndardyń ómiri men densaýlyǵyna qaýip tóndirdi.
«Atalǵan faktiler boıynsha aýdandyq prokýratýra kináli tulǵalardy QR Ákimshilik quqyq buzýshylyqtar týraly kodeksiniń 590-baby 8-bóligine jáne 230-baby 2-bóligine sáıkes sáıkes ákimshilik jaýapkershilikke tartty. Kúni búgin zań buzýshylyqtar joıylyp, aıyppul tolyǵymen óteldi», dep habarlady vedomstvodan.
Eske sala keteıik, budan buryn Batys Qazaqstanda 145 mln teńge sýbsıdııanyń zańsyz berilgenin jazǵan bolatynbyz.