Batys Qazaqstanda 122 myń gektar jerdiń paıdalanylmaı jatqany anyqtaldy
ORAL. KAZINFORM — Batys Qazaqstan oblysynda paıdalanylmaı jatqan 122,1 myń gektar aýyl sharýashylyǵy maqsatyndaǵy jerler memleketke qaıtaryldy.
BQO jer qatynastary basqarmasynyń basshysy Nurjan Maqsotovtyń Kazinform tilshisine málim etkenindeı, oblys boıynsha 120 myń gektar jerdi memleket menshigine qaıtarý týraly 2025 jylǵa arnalǵan jospar bekitilgen bolatyn. Meje 102 paıyzǵa oryndaldy.
Nurjan Erbolatulynyń sózine qaraǵanda, bıylǵy on bir aıda jergilikti atqarýshy organdarmen jalpy kólemi 53,8 myń gektar 144 jer telimi boıynsha 19 konkýrs ótkizildi. Sonyń nátıjesinde 45,7 myń gektar 122 jer telimi jańa ıelerine tabystaldy.
Taǵy bir mańyzdy másele — jaıylymdyq jerlerdiń tapshylyǵy.
— Bıylǵy 1 qańtardaǵy málimet boıynsha jeke qosalqy sharýashylyqtardaǵy mal basynyń sany negizinde 25 myń gektar jaıylymdyq jerdiń jetispeıtini baıqaldy. Oblys boıynsha jalpy kólemi 472 895 gektar jaıylymdyq jáne shabyndyq jer telimderi rezervke qoıyldy. 6 492 ga jer májbúrlep ıelikten shyǵaryldy. 4 536 gektar jer aýyldyq okrýg ákiminiń apparattaryna turaqty túrde paıdalanýǵa berildi. 135 247 ga jaıylym jer telimderi jer-sharýashylyq jobasy negizinde eldi meken jerleri sanatyna aýystyryldy, — dedi N.Maqsotov.
Onyń aıtýynsha, atqarylǵan jumystar nátıjesinde eldi mekender qosymsha 619 190 ga jaıylymdyq jáne shabyndyq alqaptarymen qamtamasyz etildi.
Jergilikti atqarýshy organdar tarapynan jaıylymdarmen qamtamasyz etý jumystary (rezervke qoıý, eldi meken jerler sanatyna aýystyrý) qajettiligine qaraı júrgiziletin bolady.
Eske sala keteıik, budan buryn Batys Qazaqstanda 74 myń gektar jerdiń memleketke qaıtarylǵanyn jazǵan edik.