Batys Qazaqstanda 12 adam AITV ınfektsııasyn juqtyrǵan
ORAL. KAZINFORM — Batys Qazaqstan oblysynda bıylǵy birinshi toqsanda 12 adamnyń AITV (adamnyń ımmýn tapshylyǵy vırýsy) ınfektsııasyn juqtyrǵany tirkeldi.
Oblystyq AITV ınfektsııasynyń aldyn alý ortalyǵynyń dırektory Nurlybek Mustaevtyń málim etkenindeı, bul ótken jyldyń osy kezeńimen salystyrǵanda, 1,8 esege tómen.
Nurlybek Ermekulynyń sózine qaraǵanda, taldaý balalar men jasóspirimder arasynda AITV ınfektsııasy anyqtalmaǵanyn kórsetti. Syrqattanǵandardyń negizgi úlesi, ıaǵnı teń jartysy 40-49 jas aralyǵyndaǵy adamdarǵa tıesili. Bul kezeń áleýmettik jáne eńbek belsendiliginiń eń joǵary ýaqyty bolyp esepteledi, bul óz kezeginde ýaqtyly aldyn alý men testileýden turaqty ótýdiń mańyzdylyǵyn kórsetedi. Basqa jas toptarynda aýrý aıtarlyqtaı sırek kezdesedi.
- AITV ınfektsııasy derekteriniń áleýmettik-demografııalyq erekshelikterine toqtalsaq, syrqattanǵandar arasynda er adamdar basym. Olardyń úlesine barlyq jaǵdaılardyń úshten ekisi, al áıelderge úshten biri tıesili. Qazirgi ýaqytta óńirde AITV ınfektsııasy kóbine jynystyq jolmen, sonyń ishinde geteroseksýaldy jáne gomoseksýaldy qatynastar arqyly berilip jatady. Sonymen qatar jańa jaǵdaılardyń edáýir bóligi áli de parenteraldy berilý jolymen, eń aldymen ınektsııalyq esirtkini tutynýmen baılanysty bolyp otyr. Kórsetkishtiń birshama tómendegenine qaramastan, bul másele ózektiligin joǵaltqan joq jáne aldaǵy ýaqytta da nazar aýdarýdy talap etedi, - deıdi N.Mustaev.
Onyń aıtýynsha, jyl basynan beri AITV ınfektsııasyn qasaqana juqtyrý faktileri tirkelgen joq.
Mamannyń pikirinshe, AITV ınfektsııasynyń aldyn alý árbir adam úshin mańyzdy bolyp qala beredi jáne ol birqatar qarapaıym, biraq tıimdi sharalardy qamtıdy. Eń aldymen, óz densaýlyǵyna jaýapkershilikpen qaraý: qaýipsiz minez-qulyq qaǵıdalaryn saqtaý, sonyń ishinde jastar arasynda jynystyq ómirdi erte bastaýdan tejelý, serigine adal bolý jáne jynystyq qatynastar sanyn azaıtý, sondaı-aq qorǵanys quraldaryn paıdalaný.
Infektsııany ýaqtyly anyqtaýǵa jáne emdeýdi bastaýǵa múmkindik beretin turaqty ári qupııa testileý mańyzdy ról atqarady. Inektsııalyq esirtkini tutyný kezinde juqtyrýǵa jol bermeýge erekshe kóńil bólý kerek, ıaǵnı tek sterıldi quraldardy paıdalaný qajet.
Kúndelikti aldyn alý sharalarynyń da mańyzy kem emes: qulaq tesý jáne kosmetıkalyq protsedýralardy tek mamandandyrylǵan kabınetterge, al tatýırovkalardy lıtsenzııasy bar stýdııalarǵa baryp jasatqan jón. Sondaı-aq tek jeke gıgıena zattaryn - ustaralardy, manıkıýr quraldaryn paıdalaný mańyzdy.
- AITV-nyń anadan balaǵa berilýiniń aldyn alý, sonyń ishinde júktilik kezindegi mindetti zertteýler jeke baǵyt bolyp tabylady. Qaýip-qateri joǵary adamdar úshin ınfektsııamen janasýǵa deıingi jáne janasýdan keıingi zamanaýı aldyn alý ádisteri kózdelgen. Juqtyrý qaýpi týyndaǵan jaǵdaıda múmkindiginshe tezirek medıtsınalyq kómekke júginý kerek, - dep qosty ortalyq basshysy.
AITV ınfektsııasy – adamnyń ımmýn tapshylyǵy vırýsynan (AITV) týyndaıtyn sozylmaly ınfektsııalyq aýrý. Ol ımmýndyq júıe jasýshalaryn zaqymdap, aǵzanyń qorǵanys fýnktsııalarynyń birtindep tómendeýine ákeledi. Bul kezde aǵza aýyr ınfektsııalar men isikterdiń keıbir túrlerine qarsy tura almaıdy.
AITV ondaǵan jyldar boıy qoǵamdyq densaýlyq saqtaý salasyndaǵy mańyzdy máselelerdiń biri bolyp qalyp otyr. Qazirgi zamanǵy terapııa ádisteri boıynda atalmysh ınfektsııa bar adamdarǵa tolyqqandy ómir súrýge múmkindik beredi.
Eske sala keteıik, budan buryn Batys Qazaqstanda 140-tan astam adamnyń jiti ishek juqpalarymen aýyrǵanyn jazǵan bolatynbyz.
