Batys Qazaqstanda 11 jylqyny urlaǵan kúdiktiler ustaldy
ORAL. KAZINFORM – Batys Qazaqstan oblysy Syrym aýdanynda polıtseıler kúdiktilerdi urlanǵan jylqyny soıyp jatqan sátinde qolǵa túsirdi.
BQO polıtsııa departamentiniń baspasóz qyzmetinen málim etkenindeı, kúdiktiler aýdan turǵynyna tıesili 11 jylqyny erkin jaıylymda júrgen jerinen aıdap ketken.
Jedel is-sharalar barysynda olardyń biriniń turǵylyqty mekenjaıyndaǵy qorasynan 7 bas jylqy tabyldy.
Ustalǵan sátte tórt jylqy soıylyp úlgergen. Shyǵyn somasy 4 mln teńgeden asady.
- Tárkilengen et pen qalǵan jylqylar zańdy ıesine qaıtaryldy. Kúdiktiler ýaqytsha ustaý ızolıatoryna qamaýǵa alyndy. Atalǵan derek boıynsha qylmystyq is qozǵaldy. Qazirgi ýaqytta tergeý jumystary júrgizilip, kúdiktilerdiń oblys aýmaǵyndaǵy ózge de osyǵan uqsas qylmystarǵa qatysy bar-joǵy anyqtalý ústinde, - dep habarlady vedomstvodan.
Eske sala keteıik, budan buryn Batys Qazaqstanda qaban aýlaǵan brakoner ustalǵanyn jazǵan edik.