Batys Qazaqstanda 11 jasar oqýshy sýǵa batyp bara jatqan qyzdy qutqardy
ORAL. KAZINFORM — Batys Qazaqstan oblysy Jánibek aýdany Taý aýylyndaǵy Ǵusman Abdýllın atyndaǵy orta mekteptiń 6-synyp oqýshysy, 11 jasar Amanat Jasqaırat erligimen kózge tústi.
Atalmysh mektepten túsken málimetke qaraǵanda, oqıǵa Oral qalasyna qarasty Zachagan kentinde bolǵan.
Amanat anasy Meńdi Qýanyshbekovamen birge naǵashy aǵasynyń úıine qydyryp kele jatyp, kishkentaı qyzdardyń «Qutqaryńyz, sýǵa batyp barady!» degen daýsyn estıdi.
Kent aýmaǵyndaǵy jylyjaıdy sýarýǵa arnalyp jasalǵan tereń sý arnasynda tunshyǵyp jatqan qyzdy kóre sala oılanbastan qutqarýǵa umtylǵan.
Ózi birge batyp-shyǵyp júrip, joǵaryda turǵan anasynyń qolyna qyzdy ustatyp, ekeýi jaǵaǵa shyǵarǵan.
Amanat dereý alǵashqy kómek kórsetip, keýdesine massaj jasaǵan kezde qyz jylap, esin jıyp, oıanypty.
Qyzdyń ata-anasy da kelip, alǵysyn aıtqan.
«Óz ómirin qaterge tigip, kishkentaı qyzdy sýdan aman alyp shyqqan Amanatty marapattaý is-sharasyn 1 qyrkúıek – Bilim kúni ótkizýdi oılastyryp otyrmyz. Osyndaı erjúrek ul tárbıelep otyrǵan aýyl turǵyny Tasbolat Aqyshev pen áriptesimiz, kishi qyzmetker Meńdi Qýanyshbekovaǵa rızashylyǵymyzdy bildiremiz», dedi Kazinform tilshisine mektep dırektory Nurtolqyn Mashanova.
Eske sala keteıik, budan buryn BQO-da úsh qyzdyń Jaıyq ózenine batyp ketkenin jazǵan edik.
