Batys Qazaqstanda 11 myńǵa jýyq turǵyn ákimshilik aıyppuldan qutyldy
ORAL. KAZINFORM — Batys Qazaqstan oblysynda 11 myńǵa jýyq azamat ákimshilik aıyppul tóleýden bosatyldy.
BQO Polıtsııa departamenti baspasóz qyzmetinen málim etkenindeı, nátıjesinde jalpy somasy 350 mıllıon teńgeden asatyn 17 500-deı ákimshilik jaza boıynsha óndirip alý sharalary toqtatyldy.
Bul kóptegen otbasylardyń qaltasyna túsetin salmaqty jeńildetken mańyzdy qadam bolǵany anyq.
Memleket basshysynyń «Qazaqstan Respýblıkasynyń jańa Konstıtýtsııasynyń qabyldanýyna oraı amnıstııa týraly» Zańǵa qol qoıǵany belgili. Osyǵan oraı Táýelsiz Qazaqstan tarıhynda tuńǵysh ret ákimshilik amnıstııa ótkizilip jatyr.
Eń aldymen bul keshirimniń óz erejesi bar. Amnıstııa jappaı bárine birdeı qoldanylmaıdy. Ol tek zańda naqty kórsetilgen baptarǵa ǵana qatysty jáne qoǵamnyń qaýipsizdigine eshqandaı qaýip tóndirmeıtin, ózge azamattardyń quqyqtaryna nuqsan keltirmeıtin jaǵdaılarda ǵana iske asady.
- Tártip saqshylary bul sharanyń mańyzdy bir shartyn eske salady: amnıstııa – bir rettik izgilik sharasy. Bul keshirim alǵan azamattar aldaǵy ýaqytta «taǵy da zań buzsam, keshiriledi» dep oılamaýy tıis. Amnıstııa bolashaqta jasalatyn quqyq buzýshylyqtar úshin jaýapkershilikten bosatpaıdy. Eger azamat dál osyndaı nemese basqa da zań buzýshylyqty qaıtalap jasasa, ol zań talaptaryna saı tolyq jaýapkershilikke tartylatyn bolady, - dep habarlady vedomstvodan.
Eske sala keteıik, budan buryn Batys Qazaqstanda ekologııa salasynda 115 zań buzýshylyq anyqtalǵanyn jazǵan edik.
