Batys Qazaqstanda 10 adam jatyr moıny obyrynan kóz jumdy

ORAL. KAZINFORM — Batys Qazaqstan oblysynda 690 áıel jatyr moıny obyrymen esepte tur.

BQO densaýlyq saqtaý basqarmasynyń bas mamany Juldyz Kárimovanyń málim etkenindeı, sonyń ishinde ótken jyly – 56, bıyl 30 áıeldiń atalmysh dertke shaldyqqany tirkeldi.

- Bıyl jyl basynan beri 10 adam jatyr moıny obyrynan qaıtys boldy. Ótken jyldyń qyrkúıek aıynan bastap jatyr moıny obyrynyń aldyn alý úshin adam papıllomasy vırýsyna qarsy qyzdardyń egilip jatqany málim, - dedi J.Kárimova.

Basqarma basshysynyń orynbasary Aınash Ǵubaıdýllına ata-analar arasynda ekpe alýdyń mańyzdylyǵyn túsinbeýshilerdiń bar ekenin jasyrmady.

- Bul ata-analardyń óz jaýapkershiligin jete sezinbeıtinin kórsetedi. Ekinshiden, áleýmettik jelidegi teris aqparattardyń jeteginde ketedi. Jaqynda aýdanda jumys saparymen bolǵan kezde shaǵyn ǵana aýylda onshaqty qyz balanyń ekpe almaǵany anyqtaldy. Ókinishke qaraı, ekpeden bas tartqan ata-analar arasynda kózi ashyq, bilimdi deıtin muǵalimder de bar. Akýsher-gınekologtar aýyldy bedeldi adamdarymen birge túsindirý is-sharalaryn júrgizip jatqanyna qaramastan, osyndaı mysaldar kezdesip otyr. Aldaǵy ýaqytta mundaı jumystar jalǵasady, - dedi A.Ǵubaıdýllına.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń naqtylaýynsha, oblys boıynsha 11-13 jastaǵy 5 309 qyz bala adam papıllomasy vırýsyna qarsy egildi. Sonyń ishinde 2 637-si – 2024 jyly, 2 672-si bıyl vaktsınatsııalaýdan ótkizildi.

Eske sala keteıik, budan buryn BQO-da 5 100 qyz balanyń jatyr moıny obyryna qarsy egilgenin jazǵan edik.