Batys Qazaqstanda 1 myńnan astam aýyl sharýashylyǵy kásiporny sanaqtan ótpekshi
ORAL. KAZINFORM — Batys Qazaqstan oblysynda 1 myńnan astam aýyl sharýashylyǵy kásipornyn, sondaı-aq 10 myńǵa jýyq sharýa qojalyqtary men jeke kásipkerlerdi sanaqpen qamtý josparlanyp otyr.
QR Strategııalyq josparlaý jáne reformalar agenttigi Ulttyq statıstıka bıýrosy BQO boıynsha departamentiniń basshysy Bolat Meshelovtiń óńirlik kommýnıkatsııalar qyzmeti alańynda ótken brıfıngide málim etkenindeı, sanaqtan ótetinderge 28 shildeden bastap sanaq.gov.kz portalynda 1414 nómirinen SMS-habarlamalar jiberile bastady.
Bolat Tileýqabylulynyń sózine qaraǵanda, qazirgi tańda salalyq birlestiktermen – astyq, sút, et jáne ózge de qaýymdastyqtarmen yntymaqtastyq ornatylǵan.
– Bul – eldegi iri aýyl sharýashylyǵy taýaryn óndirýshiler shoǵyrlanǵan birlestikter. Olar sanaq nátıjelerin alýǵa múddeli ári bizge jan-jaqty qoldaý kórsetip keledi. Alaıda elde aýyl sharýashylyǵymen aınalysatyn usaq sharýa jáne fermer qojalyqtary óte kóp. Sondyqtan biz úshin osy sanattaǵy respondentterdi de barynsha keń kólemde qamtý asa mańyzdy, - deıdi departament basshysy.
Onyń aıtýynsha, Sanaq.gov.kz saıtynda saýalnamadan ótý tetigi 1 tamyz kúni saǵat 00.00-de iske qosyldy. Saýaldarǵa jaýap berý úshin ETsQ, SMS nemese eGovMobile qosymshasyndaǵy QR-kod arqyly avtorızatsııadan ótý qajet.
Osy oraıda barlyq respondentter muqııattylyq tanytýy kerek. Tirkelý kezinde rastaý kody kórsetilgen elektrondyq poshtaǵa nemese telefonǵa birden jiberiledi. Bıýro qyzmetkerleri qońyraý shalmaıdy jáne eshqashan tórt tańbaly rastaý kodyn suratpaıdy. Saıtta saýalnamanyń eki nusqasy bolady: bireýi – aýyl sharýashylyǵy taýaryn óndirýshilerge arnalǵan, ekinshisi – baqsha, jer telimi nemese maly bar úı sharýashylyqtary úshin. Saýaldar jerdi paıdalaný, qolda bar tehnıka, mal ustaý, ınfraqurylym, aýyl sharýashylyǵy ónimin óndirý men ótkizý, eńbek jaǵdaılaryna qatysty bolady.
Saıtta saýalnamany toltyrýǵa kómektesetin kómekshi aqparat, beınenusqaýlyq bolady. Sondaı-aq táýlik boıy jumys istep, suraqtarǵa jedel jaýap beretin SANAQ myrza chat-boty bar.
– Onlaın sanaqtyń basty artyqshylyqtarynyń biri – derekterdi saqtaý múmkindigi. Eger saýalnamany toltyra bastap, aıaqtaı almasańyz, kez kelgen ýaqytta qaıta kirip, qalǵan jerinen jalǵastyrýǵa bolady. Sanaqqa qatysý úshin barlyq jaǵdaı jasalǵan. Eger aýylda kompıýter nemese ınternet bolmasa, respondentter aýdandyq ákimdikter men statıstıka bólimderindegi ózin-ózi qyzmet kórsetý aımaqtaryna júgine alady. Batys Qazaqstan oblysy boıynsha osyndaı 150 oryn sanaqtan ótýge arnalǵan qajetti tehnıkamen qamtamasyz etilgen, - dedi B.Meshelov.
Onyń atap ótkenindeı, tamyz aıynda 1446 biryńǵaı baılanys ortalyǵy táýlik boıy jumys isteıdi. Onda aýyl sharýashylyǵy sanaǵy boıynsha arnaıy jeli qarastyrylǵan. Mamandar tirkeýden ótý, tehnıkalyq aqaýlar nemese suraqtardyń mazmuny boıynsha kez kelgen saýalǵa jaýap beredi.
Onlaın sanaqtan ótpegen úı sharýashylyqtaryn 20 qyrkúıekten bastap ıntervıýerler aralaıdy. Sondaı-aq, 20 qyrkúıekte bastalatyn oflaın kezeńi úshin aýyldyq jerlerde ıntervıýerler retinde jumysqa qabyldaýǵa nıet bildirgenderdi tirkeý júrip jatyr. Jumysqa ornalasqysy keletinder aýyldyq ákimdikterge habarlasa alady.
Eske sala keteıik, budan buryn BQO-da 92 myńnan astam úı sharýashylyǵyn qamtý josparlanyp otyrǵanyn jazǵan bolatynbyz.