Batys Qazaqstan ýnıversıtetiniń rektoryna qatysty tergeý júrgizilip jatyr
ORAL. KAZINFORM — M.Ótemisov atyndaǵy Batys Qazaqstan ýnıversıtetiniń rektory Nurlan Serǵalıevtiń ustalǵany jóninde áleýmettik jelide aqparat tarady.
BQO qoǵamdyq keńesiniń múshesi, zańger Baýyrjan Ahmetjannyń Facebook áleýmettik jelisindegi paraqshasynda málim etkenindeı, ýnıversıtet basshysy laýazymdyq mindetin asyra paıdalaný deregi boıynsha qolǵa túsken. Onyń jumys orny boıynsha tintý jumystary júrgizilgen.
B.Ahmetjannyń sózine qaraǵanda, qylmystyq qýdalaýdy UQK BQO boıynsha departamentiniń sybaılas jemqorlyqqa qarsy is-qımyl qyzmeti júrgizip jatyr.
Osyǵan baılanysty Kazinform tilshisi QR Ulttyq qaýipsizdik komıtetine arnaıy suraý joldaǵan edi.
Vedomstvo rektorǵa qatysty sotqa deıingi tergep-tekserý júrgizilip jatqanyn habarlady.
— Qylmystyq-protsestik kodekstiń 201-baby 1-tarmaǵyna sáıkes ózge aqparat jarııa etýge jatpaıdy, — delingen resmı jaýapta.
Eske sala keteıik, budan buryn BQO-da memlekettik satyp alý zańyn buzǵan sheneýnikke aıyppul salynǵanyn jazǵan edik.
