Batys Qazaqstan oblystyq sotynda kadrlyq ózgerister boldy
ORAL. KAZINFORM — Batys Qazaqstan oblystyq sotynda jalpy otyrys ótip, oblystyq sot tóraǵasy Azat Іzbasarov QR Prezıdentiniń 2025 jylǵy 11 qazandaǵy № 1036 Jarlyǵymen taǵaıyndalǵan sýdıalardy tanystyrdy.
BQO sotynyń baspasóz qyzmetinen málim etkenindeı, Azat Іzbasarov olardyń sot júıesindegi kópjyldyq adal eńbegin atap ótip, jańa laýazymdarynda ádildik pen zańdylyq qaǵıdattaryna berik bolýyna tilektestigin bildirip, qyzmetterine tabys tiledi.
Varvara Dmıtrıenko Batys Qazaqstan oblystyq sotynyń sýdıasy laýazymyna taǵaıyndaldy. Sot salasynda 30 jyldan astam ýaqyt boıy jumys istep kele jatqan Varvara Dmıtrıenko 2007 jyldan osy ýaqytqa deıin Oral qalalyq sotynyń sýdıasy qyzmetin atqardy.
Sondaı-aq atalǵan laýazymdy endi Gúlshat Arystanova da atqarady. Ol 2013 jyldan bastap osyǵan deıin Oral qalasy № 2 sotynyń sýdıasy bolyp jumys istegen. Sot júıesindegi jalpy eńbek ótili — 21 jyl.
Óńirdiń qalalyq, aýdandyq sottarynda da jańa taǵaıyndaýlar boldy.
Sot júıesinde 12 jyl jumys istegen Sabyrjan Esjanov Oral qalalyq sotynyń tóraǵasy qyzmetine kiristi. Buǵan deıin ol Oral qalasy № 2 sotynyń sýdıasy boldy.
Gúljıhan Saǵıtova Aqjaıyq aýdandyq sotynyń tóraǵasy bolyp taǵaıyndaldy. Osyǵan deıin ol (sot júıesindegi jalpy eńbek ótili — 22 jyl) Aqjaıyq aýdandyq sotynyń sýdıasy boldy.
Osy salada 10 jyldan astam jumys tájirıbesi bar Tursyngúl Ómiralıeva Oral qalasy № 2 sotynyń sýdıasy boldy, buǵan deıin ol osy sottyń sot otyrysy hatshysy qyzmetin atqaryp kelgen.
Sondaı-aq Zere Sultanbek (sot júıesindegi eńbek ótili — 9 jyl) Oral qalasy № 2 sotynyń sýdıasy qyzmetine taǵaıyndaldy. Buǵan deıin ol BQO Sot ákimshiligi taldaý jáne josparlaý bóliminiń bas mamany boldy.
— Bul kadrlyq sheshimder sot júıesin odan ári nyǵaıtýǵa, ádil sot tóreliginiń qoljetimdiligi men ádilettiligin qamtamasyz etýge, sondaı-aq azamattardyń sot bıligine degen senimin arttyrýǵa baǵyttalǵan, — delingen resmı málimette.
Eske sala keteıik, budan buryn Azat Іzbasarovtyń BQO sotynyń tóraǵasy qyzmetine taǵaıyndalǵanyn jazǵan edik.