Batys Qazaqstan oblysynyń bas memlekettik sanıtar dárigeri qyzmetinen ketti

ORAL. KAZINFORM – BQO sanıtarııalyq-epıdemıologııalyq baqylaý departamentiniń basshysy Muhamǵalı Aryspaev qyzmetinen ketti. 

M.Aryspaev Facebook jelisindegi paraqshasynda qyzmetiniń Astanada jalǵasatynyn habarlady.

Onyń sózine qaraǵanda, 1989 jyly Qaraǵandy memlekettik medıtsına ınstıtýtyn oıdaǵydaı aıaqtap kelgennen keıin eńbek jolyn Batys Qazaqstan oblysynda bastaǵan. 

«Jas maman retinde Tasqala aýdanyndaǵy aýdandyq sanıtarııalyq-epıdemıologııalyq stantsııasynda alǵashqy eńbek jolym bastalyp, keıin Jańaqala aýdanynda bas sanıtar dáriger retinde shyńdaldym. Jyldar salyp Batys Qazaqstan oblysynyń memlekettik sanıtarııalyq-epıdemıologııalyq qadaǵalaý basqarmasynyń asa qaýipti aýrýlar bóliminiń dáriger-epıdemıologynan departament basshysyna deıingi barlyq eńbek satylarynan óttim. Eńbek ótilimdegi 34 jyldyń 20 jylyn memlekettik qyzmetke, adal eńbek etýge arnadym. Osy jyldar ishinde el úshin, medıtsına salasy úshin eń úlken synaq – 2020 jyly bastalǵan Covid 19 edi. Halyqty aman saqtaý, vırýstyń kóptep taralýyna jol bermeý jolynda jankeshtilikpen eńbek etken ár maman, ár áriptesim – men úshin batyr. Batys Qazaqstan óńiri maǵan árqashan ystyq meken. Bul jerden janashyr dostar, tileýles jandar, shyn tilekshi áriptester taptym. Barshańyzben birlese atqarǵan áriptestik úshin alǵysymdy jetkizgim keledi», - dep jazdy M.Aryspaev.

BQO sanıtarııalyq-epıdemıologııalyq baqylaý departamentiniń ujymy Muhamǵalı Qaıyrjanulynyń bilikti de bedeldi basshy bola bilgenin jetkizip, jańa qyzmetine sáttilik tiledi. 

Eske sala keteıik, budan buryn Oral qalasy ákiminiń orynbasary taǵaıyndalǵanyn jazǵan bolatynbyz.