Batys Qazaqstan oblysynyń aktıvi Konstıtýtsııanyń jobasyn qoldady
ORAL. KAZINFORM – Batys Qazaqstan oblysynyń ákimi Narıman Tóreǵalıevtiń tóraǵalyǵymen jańa Konstıtýtsııa jobasyn talqylaý jónindegi alqa otyrysy ótti.
Jıynǵa memlekettik jáne quqyq qorǵaý organdarynyń jetekshileri, máslıhat depýtattary, úkimettik emes uıym músheleri, zııaly qaýym, joǵary oqý oryndarynyń rektorlary, bıznes-qaýymdastyq jáne BAQ ókilderi qatysty. Aýdan ákimderi selektorlyq rejım arqyly qosyldy.
Aımaq basshysy jańa Konstıtýtsııany qabyldaý «Ádiletti Qazaqstan» qaǵıdattaryn ornyqtyrý jolyndaǵy mańyzdy ári tarıhı qadam ekenin erekshe atap ótti.
- Memleket basshysy Qasym-Jomart Kemeluly bastamashy bolǵan konstıtýtsııalyq reforma elimizdiń bolashaq damý baǵytyn aıqyndaıdy. Konstıtýtsııalyq komıssııanyń jumysy jarııa júrgizilip, nátıjesinde halyq nazaryna túzetýler jobasy usynyldy. Endeshe el taǵdyryndaǵy eleýli oqıǵaǵa baılanysty talqylaýlar da tereń, baıypty ári syndarly bolýy mańyzdy, - dedi oblys ákimi.
Oblystyq qoǵamdyq keńestiń tóraǵasy Baýyrjan Ataýov zań shyǵarýǵa bastamashylyq ete alatyn jańa ınstıtýt - Halyq Keńesiniń qurylýy jáne arnaıy zańmen rettelýi azamattyq qoǵamnyń áleýetin arttyratyn batyl bastama ekenin jetkizdi.
Jýrnalıst, QR Prezıdenti janyndaǵy Ulttyq quryltaıdyń múshesi Baýyrjan Ǵubaıdýllın vıtse-prezıdentti óz ókilettigin atqarý kezeńinde eshqandaı partııada bolmaýǵa mindetteý saıası uıymdardyń teń damý jaǵdaıyn qamtamasyz etýge, ózara básekelestikti arttyrýǵa múmkindik beretinin atap ótti.
«AMANAT» partııasy oblystyq fılıalynyń atqarýshy hatshysy Azamat Safımalıev, QHP oblystyq fılıalynyń tóraǵasy Borıs Lavrentev taǵdyrsheshti máselelerdi halyqtyń talqysynan ótkizýdegi batyl betburystarǵa oń baǵa berip, qoǵam múshelerin azamattyq jaýapkershilik tanytýǵa shaqyrdy.
Qazaqstan ınnovatsııalyq jáne telekommýnıkatsııalyq júıeler ýnıversıtetiniń prorektory Janar Dosqazıeva alǵash ret azamattardyń jeke derekteriniń tsıfrlyq ortada qorǵalýyn qamtamasyz etý mindeti negizgi qujatqa engizilgeni Ata Zańnyń ýaqyt talabyna saı ózgergenin aıǵaqtaıtynyn aıtty.
Jıyn sońynda oblys ákimi jaýapty organdarǵa jańa Konstıtýtsııa jobasyn halyqqa jan-jaqty túsindirý jumystaryn kúsheıtýdi tapsyryp, qoǵam ókilderin belsendilik tanytýǵa shaqyrdy.
