Batys Qazaqstan oblysynyń ákimi turǵyndardy Otan qorǵaýshy kúnimen quttyqtady
ORAL. KAZINFORM — BQO ákimi Narıman Tóreǵalıev óńir turǵyndaryn 7 mamyr merekesimen quttyqtap, áskerı qyzmetkerler, quqyq qorǵaý salasynyń mamandary jáne el tynyshtyǵyn kúzetip júrgen barsha azamatqa jyly lebizin bildirdi.
— Ata-babalarymyz amanattaǵan qasıetti jerimizdiń tynyshtyǵy men Táýelsizdigimizdiń tuǵyrly bolýy — ár azamattyń asyl paryzy. Prezıdentimiz, QR Qarýly Kúshteriniń Joǵarǵy Bas qolbasshysy Qasym-Jomart Kemeluly Toqaev atap ótkendeı, «Armııa — memlekettigimizdiń myzǵymas tiregi, Táýelsizdigimizdiń kepili. Otan qorǵaý — qasıetti paryz ári mártebeli mindet». Bul — el qorǵaý isiniń mańyzdylyǵyn aıshyqtaıtyn tereń oıly sóz, — dedi óńir basshysy.
Oblys ákimi óz quttyqtaýynda Memleket basshysynyń Otan qorǵaýshylarǵa jáne áskerı qyzmetkerlerge kórsetip otyrǵan aıryqsha qurmetine de nazar aýdardy.
— Bıylǵy jyldyń 14 sáýirinde Memleket basshysy halyqaralyq bitimgerlik mıssııalarǵa qatysqan áskerı qyzmetshilermen kezdesip, olardyń eńbegine joǵary baǵa berdi. Qazaqstandyq bitimgerler Birikken Ulttar Uıymynyń aıasynda 2014 jyldan beri 700-ge jýyq sarbazben túrli halyqaralyq operatsııalarǵa qatysyp, el abyroıyn asqaqtatyp keledi. Keshe ǵana Aqorda tórinde Otan qorǵaýshylar kúnine oraı ótkizilgen saltanatty jıynda memlekettik nagradalar tapsyryldy. Bul — memleket tarapynan kórsetilgen zor qurmet, joǵary baǵalaý, — dedi Narıman Tóreǵalıev.
Oral qalasyndaǵy «Atameken» óner ordasynda ótken saltanatty jıynda sondaı-aq, oblys basshysy qyzmette erekshe kózge túsken, jetistikterimen tanylǵan azamattarǵa qurmet kórsetip, alǵys hattarmen marapattady.
Shara patrıottyq rýhty kótergen áserli kontsertpen qorytyndylandy.
Buǵan deıin BQO-da qazaq kınosynyń onkúndigi bastalǵany habarlandy.