Batys Qazaqstan oblysynyń ákimi salynyp jatqan mektepterdi tekserdi
ASTANA. KAZINFORM — 2025 jylǵy 12 tamyz kúni Batys Qazaqstan oblysynyń ákimi Narıman Tóreǵalıev Oral qalasy men Báıterek aýdanynda bilim berý salasyndaǵy birqatar áleýmettik nysandardyń qurylys barysymen tanysty. Bul týraly BQO ákimdiginiń baspasóz qyzmeti habarlady.
Jumys sapary barysynda óńir basshysy mektep ınfraqurylymyn jańǵyrtý men keńeıtýge baǵyttalǵan «Keleshek mektepter» jobasy aıasynda salynyp jatqan nysandardy aralady.
Alǵashqy nysan — Oral qalasyndaǵy № 8 orta mektep. Munda jańa oqý korpýsynyń qurylysy qarqyndy júrip jatyr. Ákim qurylys jumystarynyń kestege saı jáne sapaly oryndalýynyń mańyzdylyǵyn atap ótip, jańa mektepter zamanaýı standarttarǵa saı bolýy tıis ekenin jáne oqýshylar men ustazdarǵa barynsha jaıly jaǵdaı jasalýy kerektigin aıtty.
Odan keıin Narıman Tóreǵalıev Báıterek aýdanyna qarasty Baıqonys jáne Dostyq aýyldarynda boldy. Munda 600 jáne 1200 oryndyq zamanaýı mektepter boı kóterýde. Bul nysandar oqýshy sanynyń artýyn eskerip jáne qoldanystaǵy mektepterdiń júktemesin azaıtý maqsatynda salynyp jatyr.
Sapar qorytyndysynda oblys ákimi merdiger uıymdarǵa qurylys jumystaryn ýaqytyly aıaqtaýdy tapsyrdy jáne jaýapty mekemelerge bul máseleni turaqty baqylaýda ustaýdy júktedi.
— Biz zamanaýı mektepter salý boıynsha aýqymdy baǵdarlamany júzege asyryp jatyrmyz. Bul — óńirdiń bolashaǵyna, balalarymyzdyń sapaly bilim alýyna salynǵan ınvestıtsııa. Memleket basshysy Qasym-Jomart Kemeluly Toqaev árbir mektep tek ǵımarat qana emes, bilimniń, shyǵarmashylyqtyń jáne tárbıeniń ortalyǵy bolýy tıis ekenin erekshe atap ótedi. Sondyqtan biz jumystardyń sapasyn joǵary deńgeıde qamtamasyz etip, oqýshylar men muǵalimder úshin barynsha qolaıly jaǵdaı jasaýymyz kerek, — dedi óńir basshysy.
Aıta ketelik elimizde «Keleshek mektepteri» úshin dırektorlardyń jańa býyny daıarlanyp jatyr.