Batys Qazaqstan oblysynyń ákimi Narıman Tóreǵalıev óńirlik kadrlyq rezerviniń múshelerimen kezdesti
ORAL. KAZINFORM - Oral qalasynda oblys ákimi óńirlik kadr rezerviniń múshelerimen kezdesý ótkizdi. Іs-sharaǵa Qazaqstannyń jańa býyn kóshbasshylaryn daıyndaýǵa baǵyttalǵan kadrlyq rezerv baǵdarlamasyna iriktelgen jas mamandar qatysty.
Oblys ákimi Narıman Tóreǵalıev qatysýshylardy jetistikterimen quttyqtap, kadrlyq rezervtiń óńirdiń jáne jalpy eldiń áleýmettik-ekonomıkalyq damýyna eleýli úles qosa alatyn jas mamandardy daıarlaýdaǵy mańyzdylyǵyn atap ótti.
Óz sózinde ol jas kadrlardy qoldaý oblystyń strategııalyq damýyndaǵy basty baǵyttardyń biri ekenin jáne kadrlyq rezerv músheleriniń aımaqtaǵy oń ózgeristerdiń qozǵaýshy kúshi bolatynyna senim bildirdi.
«Sizder — bizdiń óńirdiń jáne elimizdiń bolashaǵysyzdar. Sizderdiń bilimderińiz, energııalaryńyz jáne kóshbasshylyq qasıetterińiz ekonomıkamyzdy nyǵaıtýǵa, halyqtyń ómir súrý sapasyn jaqsartýǵa jáne qoǵamnyń barlyq salalaryn damytýǵa yqpal etedi. Biz sizderge maqsattaryńyzǵa jetý jolynda qoldaý kórsetýge jáne kásibı ári jeke ósýge múmkindik berýge daıynbyz», — dep atap ótti óńir basshysy.
Kezdesýde Memlekettik qyzmet isteri agenttiginiń Batys Qazaqstan oblysy boıynsha departamentiniń basshysy Murat Baısalov jas mamandardy qoldaý men olardy memlekettik basqarý júıesine ıntegratsııalaýdyń mańyzdylyǵyn erekshe atap ótti. Ol aımaqtyq kadrlyq rezerv músheleriniń óńirdiń bolashaǵyn qalyptastyratyn jas kóshbasshylar ekenin aıtty.
«Óńirlik kadr rezerviniń músheleri — bul óńirdiń bolashaǵyn qalyptastyratyn jas kóshbasshylar. Sizderdiń energııalaryńyz jáne basqarýǵa degen tyń kózqarastaryńyz jańa tásilderdi engizýge jáne ózekti máselelerdi sheshýge kómektesedi. Biz birlesken kúsh-jigermen úlken tabystarǵa jetetinimizge senimdimiz», — dep atap ótti Murat Baısalov.
Kezdesý barysynda kadr rezerviniń músheleri ózderiniń qoǵamnyń ártúrli salalaryn jaqsartýǵa baǵyttalǵan ıdeıalarymen jáne jobalarymen bólisti. Basqarýdyń tıimdiligin arttyrý, ınnovatsııalardy damytý jáne bıznestiń áleýmettik jaýapkershiligin arttyrý máseleleri talqylandy.
Oblys ákimi qatysýshylardy óńir ıgiligi úshin belsendi jumys isteýge shaqyryp, olardyń bastamalary men kásibı jetistikteri aımaqtyń damýyna tikeleı baılanysty ekenin atap ótti.
Eske sala keteıik, irikteý 35 jasqa deıingi, joǵary bilimi bar jáne keminde 3 jyl jumys ótili bar Qazaqstan azamattarynyń arasynda júrgizildi. Jobanyń negizgi maqsaty óńirlerdi damytýǵa talantty jastardy tartý jáne jas basqarýshylardyń aımaqtyq pýldaryn qalyptastyrý bolyp tabylady.
Jalpy, Batys Qazaqstan oblysynan joba saıtyna 423 adam tirkelip, olardyń 273-i irikteýge jiberildi.
