Kırov sý qoımasy 58 jyldan keıin alǵash ret kúrdeli jóndeýden ótip jatyr

ORAL. KAZINFORM — Uzyndyǵy 4 shaqyrymnan asatyn Kóshim sý kanalynyń jóndeý jumystary tolyǵymen aıaqtaldy. Sý qoımasynyń bógeti 84%-ǵa jóndeldi - shamamen 1,5 shaqyrym bóligi qaıta jańartyldy. Bul týraly Sý resýrstary jáne ırrıgatsııa mınıstrligi habarlady. 

— Sý jiberý kanalynyń jóndeý jumystary 69%-ǵa, al Pervomaı magıstraldy kanalynyń jóndeý jumystary 66%-ǵa oryndaldy. Sý qoımasyndaǵy baqylaý-ótkizý beketteri men elektrmen jabdyqtaý júıesiniń qurylysy 80%-ǵa aıaqtaldy, — delingen habarlamada. 

Mınıstrliktiń málimetinshe, jyl sońyna deıin Kırov sý qoımasyndaǵy barlyq jóndeý jumysyn tolyq aıaqtaý josparlanǵan.  

Jobanyń júzege asýy Kırov sý qoımasynyń senimdiligin arttyryp, tutynýshylarǵa sýarmaly sýdyń úzdiksiz jetkizilýin qamtamasyz etedi. Qaıta jańǵyrtý jumystary nátıjesinde sý qoımasynyń syıymdylyǵy ulǵaıyp, jumysy tıimdirek bolady. Bul Batys Qazaqstan oblysyndaǵy 12 myń gektardan astam jerdi sýarýǵa múmkindik beredi.

Kırov sý qoımasy 1967 jyly paıdalanýǵa berilgen. Qoımanyń syıymdylyǵy — 62,9 mln tekshe metr. Bul nysan Ýral-Kóshim sýarý-sýlandyrý júıesiniń quramyna kiredi.

— Sý resýrstaryn basqarý júıesin damytý tujyrymdamasyna sáıkes, mınıstrligimiz 37 sý qoımasyna keshendi túrde qaıta jańǵyrtý jumystaryn júrgizýdi josparlap otyr. Byltyr Aqtóbe sý qoımasyna 36 jyldan keıin alǵash ret jóndeý júrgizildi. Qazirgi kezde onyń syıymdylyǵy 245 mln tekshe metr. Sondaı-aq Túrkistan oblysyndaǵy Qapshaǵaı sý qoımasynda jóndeý jumystary jalǵasyp jatyr», — dedi Sý resýrstary jáne ırrıgatsııa vıtse-mınıstri Erbolat Ibraıhanov.

Eske sala keteıik, buǵan deıin Sý resýrstary mınıstrligi 1,3 mln adamdy aýyz sýmen qamtý úshin 2500 shaqyrym sý qubyryn salyp jatqanyn jazǵan edik.