Batys Qazaqstan oblysyndaǵy eń kóne vokzal ǵımaraty súrilip, jańadan salyndy
ORAL. KAZINFORM — Tasqala aýdanyndaǵy Semıglavyı Mar stantsııasynyń 110 jyldyq tarıhy bar.
Jańadan salynǵan nysan saltanatty túrde paıdalanýǵa berildi. Oǵan aımaq basshysy Narıman Tóreǵalıev, BQO máslıhat depýtatary, «Qazaqstan temir joly» UK» AQ Aqtóbe magıstraldy jeli bólimshesi dırektorynyń birinshi orynbasary Jaılaýbaı Serǵalı, oblystyq ardagerler keńesiniń tóraǵasy Maqsot Bergen qatysty.
Oblys ákimi Narıman Tóreǵalıev Memleket basshysy Qasym-Jomart Toqaevtyń temirjol ınfraqurylymdaryn damytý jónindegi tapsyrmasyna sáıkes qolǵa alynǵan jobanyń mańyzyna toqtaldy.
— Prezıdent tapsyrmasyna sáıkes biz negizgi kólik nysandaryn jańartý boıynsha keshendi jumysty aıaqtaı keldik. Bul jolaýshylardyń jaǵdaıyn jaqsartyp qana qoımaı, oblys ekonomıkasy men logıstıkasynyń damýyna da septigin tıgizedi, — dedi Narıman Tóreǵalıev.
Semıglavyı Mar beketi arqyly kúnine 2 poıyz qatynaıdy. Stantsııa salynǵaly jibi túzý jóndeý kórgen joq. Mańyzdy nysannyń jańǵyrtylýy jolaýshylar úshin jaıly jaǵdaı jasap qana qoımaı, oblys ekonomıkasy men logıstıkasyn damytýǵa tyń serpin beredi.
Joba aıasynda stantsııa súrilip, jańadan salyndy. Zamanaýı kútý zaldary jasaqtalyp, jańartylǵan navıgatsııa jáne aqparattandyrý júıeleri ornatyldy. Ǵımarattyń sáýleti qazirgi zamanǵa laıyqtalyp, aınalasy abattandyryldy.
Aıta keteıik, byltyr óńirde 419 myń jolaýshy poıyzben qatynaǵan. Temirjol arqyly 5 mln tonna júk tasymaldanǵan.
