Batys Qazaqstan oblysynda sút óndirisi artyp keledi
ORAL. KAZINFORM — Júzege asyrylyp jatqan jobalardyń arqasynda óńirdegi sútpen qamtylý deńgeıi 22,3%-dan 36,8%-ǵa deıin artty, dep habarlaıdy BQO ákimdiginiń baspasóz qyzmeti.
Batys Qazaqstan oblysynda aýyl sharýashylyǵy salasyn damytý baǵytyndaǵy jumystar aıasynda sút-taýar fermalarynyń qurylysy men keńeıtilýi belsendi júrgizilip jatyr. Bul sharalar «Agroónerkásiptik keshen salasyndaǵy jobalarǵa kredıt berý» memlekettik baǵdarlamasy arqyly iske asyrylyp jatyr.
2023 jyly osy baǵdarlama aıasynda 1 900 basqa arnalǵan 4 iri sút-taýar fermasyn salýǵa jáne keńeıtýge birqatar qarajat bólindi. Qazirgi tańda osy jobalardyń ekeýi paıdalanýǵa berilse, qalǵan ekeýiniń qurylysy bıylǵy jyldyń birinshi jartyjyldyǵynda aıaqtalady dep kútilip otyr.
Al 2024 jyly taǵy 3,8 mıllıard teńge kóleminde bıýdjettik nesıe qarajaty bólinip, 400 basqa arnalǵan jańa sút-taýar fermasynyń qurylysy qolǵa alyndy. Buǵan qosymsha, jeke ınvestorlardyń biri óz qarajatyna osyndaı qýattaǵy taǵy bir fermanyń qurylysyn júrgizip jatyr.
— Júzege asyrylyp jatqan bul jobalar oblystyń sút ónimine degen ishki qajettiligin óteýge eleýli úles qosyp keledi. Sonyń nátıjesinde óńirdegi sútpen qamtylý deńgeıi 22,3%-dan 36,8%-ǵa deıin artyp, jyldyq óndiris kólemin 41,2 myń tonnaǵa deıin jetkizý josparlanyp otyr, — delingen ákimdik habarlamasynda.
Buǵan deıin BQO-da qýaty 12 megavatt bolatyn jańa jylý elektr týrbınasy iske qosylǵany anyqtaldy.