Batys Qazaqstan oblysynda iri ınternet-alaıaqtyq áshkerelendi
ASTANA. KAZINFORM — Polıtsııa departamentiniń kıberqylmysqa qarsy is-qımyl basqarmasynyń qyzmetkerleri jedel-izdestirý is-sharalary barysynda krıptovalıýtaǵa ınvestıtsııa jasaý arqyly ınternet-alaıaqtyqtyń aýqymdy syzbasyn uıymdastyrdy degen kúdiktini ustady, dep habarlaıdy Polisia.kz.
Іri alaıaqtyq boıynsha qolǵa túsken kúdikti Batys Qazaqstan oblysynyń 27 jastaǵy turǵyny ekeni anyqtaldy.
Tergeý barysynda kúdiktiniń krıptovalıýta satyp alý-satý syltaýymen oblystyń 20-dan astam turǵynyn alaıaqtyqqa «dropper» retinde tartqany belgili boldy. Urlanǵan aqsha dropperlerdiń bank shottary arqyly aýdarylǵan.
Kúdikti túsken qarajatty Bybit jáne Binance onlaın-platformalary arqyly krıptovalıýtaǵa aınaldyryp, alaıaqtarǵa jiberip, osy qyzmeti úshin syıaqy alyp otyrǵan. Ol Astana qalasynda qolǵa tústi. Qazirgi ýaqytta ol Oralda qamaýda otyr. Qylmystyq is boıynsha tergeý aıaqtalýǵa jaqyn.
- Osy rette polıtsııa qyzmetkerleri halyqty barynsha muqııat bolýǵa shaqyrady. Jeke derekterińizdi jáne bank rekvızıtterińizdi bógde adamdarǵa bermeýdi suraıdy. Sebebi siz qylmystyq is-áreketke qatysty adamǵa aınalýyńyz múmkin, - delingen aqparatta.
Bank shotyna, tólem nemese sáıkestendirý quraldaryna zańsyz qol jetkizý, ony berý nemese alý, sondaı-aq zańsyz tólemder men aqsha aýdarymdaryn júzege asyrý, onyń ishinde materıaldyq syıaqy úshin úshinshi tulǵalarǵa bank kartasyn berý áreketteri dropperlik bolyp sanalady.
Bul áreket ınternet-alaıaqtyqtyń negizgi ádisteriniń biri. Urlanǵan qarajatty qolma-qol aqshaǵa aınaldyrý men shyǵarý úshin qoldanylady. Atalǵan norma kıberalaıaqtyqqa qarsy júıeli kúresti, azamattardyń qarjylyq qaýipsizdigin nyǵaıtýdy jáne tsıfrlyq ortada áreket etetin qylmystyq toptardyń qyzmetin toqtatýdy kózdeıdi.
Aıta keteıik, elimizde ınternet-alaıaqtyq pen esirtkiden túsken kiristerdi jylystatýǵa arnalǵan servıs anyqtaldy.