Batys Qazaqstan oblysynda Prezıdent Joldaýyn iske asyrý máseleleri talqylandy
ORAL. KAZINFORM — Búgin, 4 qarashada Oral qalasynda Batys Qazaqstan oblysynyń ákimi Narıman Tóreǵalıevtiń tóraǵalyǵymen Qazaqstan Prezıdenti Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Joldaýyn talqylaýǵa arnalǵan oblystyq aktıv otyrysy ótti.
Jıynda Joldaýda belgilengen negizgi baǵyttar men olardy óńirde júzege asyrý sharalary qaraldy. Atap aıtqanda, ekonomıkany damytý, ınvestıtsııa tartý, áleýmettik nysandar salý, jol jáne ınjenerlik ınfraqurylymdy jańǵyrtý, tsıfrlandyrý jáne aýyl sharýashylyǵyn qoldaý máselelerine erekshe nazar aýdaryldy.
Kezdesý barysynda qatysýshylar atqarylyp jatqan jumystar men aldaǵy jyldarǵa arnalǵan josparlar týraly baıandady. Sońǵy tórt jylda oblysta 38 mektep salynyp, 7 myńnan astam páter paıdalanýǵa berildi. Sondaı-aq shamamen 1,5 myń shaqyrym avtomobıl joly jóndelip, jańǵyrtyldy.
Áleýmettik ınfraqurylymdy odan ári damytý aıasynda jańa mektepter, medıtsınalyq mekemeler, sport jáne mádenıet nysandaryn salý josparlanýda. Atap aıtqanda, 2027 jyly Oral qalasynyń «Juldyz» shaǵynaýdanynda 1500 oryndyq mekteptiń, sondaı-aq oblys aýdandarynda apatty jaǵdaıdaǵy bes mekteptiń ornyna jańa bilim berý nysandaryn salý kózdelgen.
Sonymen qatar óńirdiń kólik-logıstıkalyq áleýetin damytý, avtomobıl ótkizý pýnktterin rekonstrýktsııalaý, ekonomıkanyń túrli salalaryna jasandy ıntellekt pen tsıfrlyq sheshimderdi engizý perspektıvalary talqylandy.
Oblys ákimi basqarma basshylaryna, Oral qalasy men aýdan ákimderine Joldaýdy iske asyrý jónindegi naqty mindetter, merzimder jáne jaýapty oryndaýshylar aıqyndalǵan óńirlik is-sharalar josparyn ázirleýdi tapsyrdy.
Narıman Tóreǵalıev qurylys jáne jol jumystarynyń sapasyna, ınvestıtsııalyq jáne agroónerkásiptik jobalardyń júzege asyrylýyna, sondaı-aq bıýdjet qarajatynyń tıimdi paıdalanylýyna erekshe nazar aýdarý qajettigin atap ótti.
Jıyn qorytyndysy boıynsha jaýapty basshylarǵa qoıylǵan mindetterdiń oryndalýyn jeke baqylaýǵa alý tapsyryldy. Jumystyń basty ólshemi — halyqtyń ómir súrý sapasyn naqty jaqsartý.
