Batys Qazaqstan oblysynda pyshaq jaraqatyn alǵan oqýshy jazylyp shyqty

ORAL. KAZINFORM — Budan buryn habarlanǵanyndaı, Batys Qazaqstan oblysy Terekti aýdany Podstepnyı aýylynda bir oqýshy ekinshisine pyshaq suǵyp alǵan bolatyn. Kúdikti ustalyp, qylmystyq is qozǵalǵan edi.

BQO bilim basqarmasynyń baspasóz qyzmetinen málim etkenindeı, zardap shekken oqýshy jazylyp shyǵyp, qazirgi kezde mektepte oqyp júr.

— Oqıǵa bolǵan kezde mektepti dırektordyń mindetin atqarýshy basqarǵan edi. Keıin jańadan dırektor taǵaıyndaldy. Oqýshylarmen jeke jumystar júrgizilip keledi. Olarǵa er muǵalim tálimger retinde bekitilgen, — dep habarlady vedomstvodan. 

BQO polıtsııa departamenti baspasóz qyzmetiniń málimetinshe, búgingi tańda qylmystyq is óndiriste, tergeý amaldary jalǵasyp jatyr. 

Eske sala keteıik, budan buryn BQO-da bir oqýshy ekinshisine pyshaq suǵyp alǵanyn jazǵan edik.