Batys Qazaqstan oblysynda Naýryz meıramy jańasha toılandy
ORAL. KAZINFORM – Batys Qazaqstan oblysynda Naýryz meıramy keńinen toılandy. 22 naýryz kúni Oral qalasynda merekelik is-shara ótti. Qala turǵyndary men qonaqtary kontserttik baǵdarlamany, teatrlandyrylǵan qoıylymdardy tamashalady.
Óńir turǵyndaryn Batys Qazaqstan oblysynyń ákimi Narıman Tóreǵalıev Naýryz meıramymen quttyqtady.
«Jerlesterimdi Naýryz merekesimen shyn júrekten quttyqtaımyn. Áz Naýryz – ultymyzdyń bolmysyn, salt-dástúrin, ádet-ǵurpyn, tálim-tárbıesin, rýhanııatyn aıshyqtaıtyn meıram. Bıyl Memleket basshysynyń bastamasymen 10 kún boıy jańa formatta toılanyp jatqan Naýryz meıramy kóptiń kóńilinen shyqty. Prezıdentimiz keshegi quttyqtaýynda el ıgiligi jolynda atqarylatyn jumystarǵa da toqtaldy. Óńirlerdegi jylý ortalyqtary jáne ınjenerlik jeliler jańǵyrtylady. Elimizde 12 myń shaqyrym jol salynyp, jóndeledi. 300 myń adam tabıǵı gazdyń ıgiligin kóre bastaıdy. Aýyl jáne aýdan turǵyndary úshin jańa turǵyn úı baǵdarlamasy iske qosylady. Áleýmettik jaǵynan osal toptaǵy azamattar úshin nesıe ósimi 7 paıyzdan aspaıtyn bolady. Jalǵa beriletin baspana sany birneshe ese kóbeıedi. Prezıdent munyń bári halyqtyń turmys sapasyn jaqsartýǵa yqpal etetinin aıtqan bolatyn. Halyqqa arnalǵan osyndaı ıgi sharalar mindetti túrde Batys Qazaqstan óńirin de qamtıdy. Biz turǵyndarǵa qajetti áleýmettik-medıtsınalyq nysandardy, jol salýdy, turǵyn úı qurylysyn júrgizýdi jáne taǵy da basqa mańyzdy jumystardy jalǵastyramyz», - dep atap ótti Narıman Tóreǵalıev.
Tuńǵysh Prezıdent alańyna jınalǵan oblys turǵyndary kıiz úılerge kirip, án-kúı tyńdap, ulttyq taǵamdardan dám tatty.
Naýryz meıramy Batys Qazaqstan oblysynyń ár aýdanynda keńinen atalyp ótti.
