Batys Qazaqstan oblysynda maldan ishinara shyǵyn bar

ORAL. KAZINFORM – Batys Qazaqstan oblysynda 2 292 qystaqta mal qystatylyp jatyr.

BQO aýyl sharýashylyǵy basqarmasynyń basshysy Aıan Halaýedın óńirlik kommýnıkatsııalar qyzmeti alańynda ótken brıfıngide Kazinform tilshisiniń «Oblystyń Bókeı ordasy men Jánibek aýdandarynda maldan shyǵyn bar degen aqparattar túsip jatyr. Ol qanshalyqty ras?» degen saýalyna jaýap berdi.

Basqarma basshysynyń sózine qaraǵanda, sharýa qojalyqtarynda ishinara mal shyǵyny, jylqydan tól tastaý bar.

«Munyń sebebi maldyń qystaqqa qońsyz kirýine baılanysty. Óıtkeni 2023 jyly Bókeı ordasy, Jánibek aýdandary qolaısyz boldy. Shabyndyq, jaıylymdar oıdaǵydaı jaqsy bolǵan joq. Oǵan qosa qarasha, jeltoqsan aılary jańbyrly, óte jeldi, borandy boldy. Soǵan baılanysty mal qystaqqa óte qońsyz kirdi. Aýdandardyń berip otyrǵan málimetine sáıkes jem-shóp jetkilikti. Mysaly, Jánibek aýdany jemdi Reseı Federatsııasynan tonnasyn 75 myń teńgeden alyp otyr. Bókeı ordasy aýdanyna Oral qalasynan 80-85 myń teńgeden jetkizilýde. Jalpy jaǵdaı baqylaýda», - dedi A.Halaýedın.