Batys Qazaqstan oblysynda mádenıet úıi paıdalanýǵa berildi
ORAL. KAZINFORM — Respýblıka kúni qarsańynda Batys Qazaqstan oblysy Aqjaıyq aýdanynda Qabyrshaqty aýyldyq mádenıet úıi paıdalanýǵa berildi. Saltanatty rásimge aımaq basshysynyń orynbasary Qaıyrjan Meńdiǵalıev, aýdan basshylyǵy men aýyl turǵyndary qatysty.
1961 jyly salynǵan burynǵy mádenıet úıiniń tozyǵy jetip, apatty dep tanylǵan. Sý jańa nysannyń boı kóterýi aýyldyq okrýgtiń mádenı ómirine tyń serpin bermek. 376 mln teńgeniń jobasyn «AlTım» JShS júzege asyrdy. Jańa ǵımarattaǵy kórermen zaly 100 orynǵa laıyqtalǵan.
Aımaq basshysynyń orynbasary aqjaıyqtyqtarǵa oblys ákimi Narıman Tóreǵalıevtiń quttyqtaýyn jetkizdi.
— Aýyldyń ajary kórikti kelbetimen ǵana emes, rýhanı baılyǵymen de ólshenedi. Osy turǵydan alǵanda, jańa nysannyń el ıgiligine berilýi Qabyrshaqty aýylynyń áleýmettik-mádenı ómirindegi aıtýly ózgeris ekeni sózsiz. Barshańyzdy aımaq basshysynyń atynan ulttyq merekemen quttyqtaı otyryp, ár shańyraqqa amandyq pen shattyq tileımin. Mádenıet úıi birlik pen bereke, óner men ónegeniń ordasyna aınalǵaı, — dedi Qaıyrjan Meńdiǵalıev.
Aýyl turǵyndary sóz sóılep, oblys basshylyǵy men ıgilikti istiń basy-qasynda júrgen azamattarǵa rızashylyǵyn jetkizdi. Jınalǵandar mádenıet úıin aralap, kontserttik baǵdarlamany tamashalady. Óner ujymyna oblys ákimi Narıman Tóreǵalıevtiń atynan 10 dombyra tartý etildi. Jańa nysannyń aýlasyna qaraǵaı kóshetteri otyrǵyzyldy.
Aıta keteıik, keıingi úsh jylda Aqjaıyq aýdanyna qarasty Jambyl, Mergen jáne Býdarın aýyldarynda mádenıet úıleri kúrdeli jóndeýden ótip, Kónekketken aýylynda jańa ǵımarat paıdalanýǵa berildi. 2023 jyldan beri óńir boıynsha 17 mádenıet nysany jańadan salyndy.
