Batys Qazaqstan oblysynda qyzylshamen aýyryp jatqan 13 balanyń jaǵdaıy aýyr
ORAL. KAZINFORM – Batys Qazaqstan oblysynda qyzylshadan keler qaýip seıilmeı tur. Osyǵan baılanysty Kazinform tilshisi BQO densaýlyq saqtaý basqarmasy basshysynyń orynbasary Aınash Ǵubaıdýllınadan suhbat alǵan edi.
- Aınash Jubanyshqyzy, qyzylshadan keler qaýiptiń seıilmeı turǵany neden dep oılaısyz?
- Qyzylsha aýrýynyń beleń alýyna baılanysty elimizdegi epıdemıologııalyq ahýal kópshilikti alańdatyp otyr. Qyzylsha – óte joǵary juqpaly jiti vırýstyq aýrý, aýa-tamshy jolymen beriledi. Atalmysh dert qyzylsha entsefalıti, menıngıt, pnevmonııa jáne basqa aýyr asqynýlarǵa soqtyrýy múmkin. Odan tek ekpe alý arqyly qorǵanýǵa bolady.
Kúni búginge deıin Batys Qazaqstan oblysynda ekpeden bas tartýshylar sany – 4 394. Sonyń ishinde 1 142-si (25,9 paıyzy) – jeke kózqarastary boıynsha, 1 051-i (23,9 paıyzy) – vaktsınaǵa senbeýshiler, 286-sy (6,5 paıyzy) – asqyndyryp alýdan qorqatyndar. Óńirde bir jasqa deıingi balalar arasynda aýrý kúsheıip tur. Ata-analar arasynda túsindirý jumystary barynsha jasalǵanymen, ekpeniń mańyzdylyǵyn túsingisi kelmeıtinderdiń sany basym.
- Ekpe jumystary qalaı júrgizilip jatyr, vaktsına jetkilikti me?
- Qyzylshaǵa qarsy qosymsha jappaı ımmýndaý jumystary 2023 jyldyń 6 qarashasynan bastaldy. Qyzylshaǵa qarsy qosymsha jappaı ımmýndaýǵa BQO boıynsha 50 500 bala jatady. Qazirgi tańda 36 516 bala egildi (72,3 paıyz). Tarqatyp aıtsaq, 6-10 aılyq 5 857 sábıdiń 3 935-i (67,1 paıyzy), 2-4 jastaǵy 31 700 balanyń 28 575-i (90,1 paıyzy) vaktsınatsııadan ótkizildi. Sonymen qatar qyzylshaǵa qarsy tolyqtyra vaktsınatsııalaýǵa jatatyn 5-18 jastaǵy 4 237 balanyń 2 729-i (64,4 paıyzy) ekpe aldy. Vaktsına jetkilikti.
- Jýyrda oblys ákimdiginde ótken jıynda jeke balabaqshalarda búldirshinderdiń ekpe alýy oıdaǵydaı emestigi aıtyldy, buǵan ne aıtar edińiz?
- Jeke balabaqshalar arasynda qosymsha jappaı ımmýndaý jumystary júrgizilip jatyr. BQO boıynsha balabaqshalarda tárbıelenetin 23 334 bala egýge jatady. 2 aqpan kúngi málimet boıynsha egilgeni – 18 604 (79,7 paıyz). Onyń ishinde memlekettik balabaqshalardyń 94 paıyzy, jeke bóbekjaılardyń 70 paıyzy qosymsha jappaı ımmýndaýmen qamtyldy. Bul – áli de biraz bóligi qamtylmaı otyr degen sóz. Sondyqtan qazirgi jaǵdaı jumysty shırata túsýdi qajet etedi.
- Keıbir ata-analar «ekpeden keıin aýrý asqynady» degen pikirde, buǵan ne aıtar edińiz?
- Kez kelgen vaktsınatsııadan keıin kútiletin ekpeden keıingi reaktsııalar bolýy múmkin, óıtkeni balanyń aǵzasyna antıgen engiziledi (qyzylsha ekpesi jaǵdaıynda qyzylshaǵa qarsy álsiregen tiri vırýs). Mundaı reaktsııalar, ádette, qyzylshaǵa qarsy ekpeden keıin 5-6, 10-11 kúnderi paıda bolady jáne temperatýranyń joǵarylaýy, tamaqtyń qyzarýy, jótel, bórtpe túrinde kórinedi. Bir-eki kún ishinde ózdiginen ketedi. QR Ulttyq profılaktıkalyq egý kúntizbesine sáıkes jyl saıyn qyzylshaǵa qarsy 1 jastaǵy jáne 6 jastaǵy balalar egiledi, bul shamamen 24 000 adam. 2023 jylǵy qarasha aıynan bastap qosymsha jappaı ımmýndaý kezeńinde 40 myń bala egildi, qolaısyz saldarlar tirkelgen joq.
- Oblysta qyzylshadan em alyp jatqandardyń jaǵdaıy qalaı, jansaqtaý bóliminde jatqandar bar ma?
- Bıylǵy 5 aqpandaǵy ahýal boıynsha 83 patsıent statsıonarlyq em alyp jatsa, sonyń 16-synyń (19,3 paıyzynyń) jaǵdaıy aýyr. Sonyń ishinde 13-i – bala. Patsıentterdiń aýyrlyǵy negizinen ýyttaný men vırýstyq pnevmonııanyń damýynan tynys alý jetkiliksizdigine baılanysty. Eki bala jansaqtaý bólimshesinde em alyp jatyr.
- Áńgimeńizge rahmet. Qyzmetińizge tabys tileımin.
Eske sala keteıik, budan buryn Batys Qazaqstanda on kúnde 50-ge jýyq adamnan qyzylsha anyqtalǵanyn jazǵan bolatynbyz.
