Batys Qazaqstan oblysynda gaz óńdeý zaýyty salynady
ASTANA. KAZINFORM – BQO-da Qarashyǵanaq ken ornynda qýattylyǵy jylyna 4 mlrd tekshe metr gaz óńdeý zaýyty salynady. Bul týraly óńir ákimi Narıman Tóreǵalıev málim etti.
«Oblysta óndiris salasy turaqty damyp keledi. Investıtsııa tartý arqyly óndiris oryndaryn ashyp, otandyq jáne jergilikti ónim túrlerin kóbeıtýdi basty nazarda ustap otyrmyz. Respýblıka kúni qarsańynda munaı gaz salasyna qajetti keıbir jabdyqtardy óndiretin zaýyt iske qosylyp, shıkizat óndirisine qajetti qural-jabdyqtar óndirile bastady», - dedi Narıman Tóreǵalıev Ortalyq kommýnıkatsııalar qyzmeti alańynda ótken baspasóz máslıhatynda.
Ákimniń aıtýynsha, óńirde ónerkásip kólemin arttyrý baǵytynda Qarashyǵanaqty keńeıtý jobasy qolǵa alyndy.
«Ótken jyly 4-shi kompressor, bıyl 5-shi kompressor paıdalanýǵa berildi, al 6-shy kompressordyń qurylysy aıaqtalýǵa jaqyn. Atalǵan joba Qarashyǵanaq ken ornyndaǵy shıki gazdy daıyndaý, keri aıdaý jáne gazdy óndirý kólemin ulǵaıtýǵa baǵyttalǵan. Aldaǵy ýaqytta Qarashyǵanaq ken ornynda qýattylyǵy jylyna 4 mlrd tekshe metr gaz óńdeý zaýytyn salý josparlanýda. Qazir osy baǵytta jumystar atqarylyp jatyr», - deıdi ol.
Osylaısha jańa gaz óńdeý zaýytynyń iske qosylýy turǵyndardy, elde óndirilgen taýar gazymen qamtamasyz etýge múmkindik beredi.
