Batys Qazaqstan oblysynda FIFA standarttaryna saı fýtbol alańy bar stadıon ashyldy

ORAL. KAZINFORM – Batys Qazaqstan oblysynyń Aqsaı qalasynda qaıta jańǵyrtylǵan «Jastar» stadıony paıdalanýǵa berildi, dep habarlady BQO ákiminiń baspasóz qyzmeti.

v
Foto: BQO ákimdigi

Stadıonnyń ashylý saltanatyna oblys ákimi Narıman Tóreǵalıev, tapsyrys berýshiler men merdiger kompanııa basshylary, aýdan turǵyndary qatysty.

k
Foto: BQO ákimdigi

Aımaq basshysy jınalǵandardy Qazaqstan Táýelsizdiginiń 35 jyldyǵy qarsańynda jańarǵan sport nysanynyń ashylýymen quttyqtady. Ol buqaralyq sportty damytý jáne ult saýlyǵyn nyǵaıtý memlekettik saıasattyń basym baǵyttarynyń biri ekenin atap ótti.

– Memleket basshysy Qasym-Jomart Kemeluly Toqaevtyń tapsyrmasyna sáıkes óńirimizde áleýmettik ınfraqurylymdy damytý baǵytynda aýqymdy jumystar atqaryldy. 2023-2026 jyldary jańa 132 áleýmettik nysan paıdalanýǵa berildi. Onyń ishinde 24 sport nysany salyndy. Barlyq aýdan ortalyǵy men iri aýyldar dene shynyqtyrý-saýyqtyrý keshenderimen qamtyldy. Endi mundaı zamanaýı nysandar shaǵyn eldi mekenderde boı kóterip jatyr. Qaıta jańǵyrtylǵan «Jastar» stadıony jas sportshylardy jańa belesterge qanattandyratynyna senim mol, – dedi Narıman Tóreǵalıev.

A
Foto: BQO ákimdigi

Kópbeıindi sport kesheni «KPO B.V.» kompanııasynyń áleýmettik mindettemeleri aıasynda qaıta jańǵyrtyldy.

Munda zamanaýı sport zaly, FIFA standarttaryna saı fýtbol alańy, ulttyq oıyndar men jattyǵýlarǵa arnalǵan alańdar, júgirý joldary jáne ekstremaldy sport túrlerine arnalǵan arnaıy aımaq qarastyrylǵan.

Jobany ýaqytyly ári sapaly júzege asyrǵan «Qaldyǵaıty» merdigerlik kompanııasyna oblys ákiminiń alǵys haty tabystaldy.

Saltanatty rásimnen keıin aımaq basshysy sport alańdaryn aralap, mekeme basshylyǵymen, bapkerlermen jáne jas sportshylarmen tildesti.

a
Foto: BQO ákimdigi

Stadıondaǵy qurmet taqtasyna Bórli aýdanynan shyqqan álem chempıondary Temirlan Kólbaı, Gúldana Álmuhambetova, Merýet Baınııazova, Málik Muqashev jáne Azarııa Hammıdýllınanyń sýretteri qoıylyp, sporttyq jetistikteri jazylǵan.

Oblys ákimi bul bastamany oń baǵalap, álem chempıondarynyń jetistikteri jas sportshylarǵa úlgi bolyp, olardy jańa belesterge yntalandyratynyna senim bildirdi.

Sonymen qatar «KPO B.V.» kompanııasynyń áleýmettik jáne ınfraqurylymdyq jobalary aıasynda Aqsaı qalasynda ońaltý ortalyǵy, Oqýshylar jáne jastar saraıynyń qurylysy júrip jatyr.

v
Foto: BQO ákimdigi

Aıta keteıik, buǵan deıin Batys Qazaqstan oblysynyń Tasqala aýdanynda «QPO B.V.» kompanııasynyń áleýmettik mindettemeleri aıasynda 320 kórermenge arnalǵan dene shynyqtyrý-saýyqtyrý kesheni ashylǵan edi.