Batys Qazaqstan oblysynda eki jylda 1 myń shaqyrym jol jóndelgen
ORAL. KAZINFORM — Memleket basshysynyń tapsyrmasyna sáıkes, Batys Qazaqstan oblysynda 2023-2024 jyldary aralyǵynda 1 myń kılometrden astam jol jóndelgen. Atap aıtqanda, 2023 jyly — 562 km jol jóndelse, 2024 jyly — 445 km joldyń qurylysy aıaqtalǵan.
BQO ákimdiginiń baspasóz qyzmeti málimetinshe, Podstepnoe-Fedorovka-RF shekarasy baǵytynda 4 kezeńnen turatyn barlyǵy 144 km joldyń bıyl birinshi jáne tórtinshi kezeńderi, ıaǵnı 72 km joly qaıta jańǵyrtylsa, ekinshi jáne úshinshi kezeńderi (72 km) 2025 jyly KPO b.v kompanııasy esebinen iske asyrylatyn bolady. Kúni búginde, atalǵan ýchaskelerde ınertti materıaldardy tasymaldaý, aınalma joldardy daıyndaý jumystary júrgizilýde.
El Prezıdentiniń 2019 jyly bergen tapsyrmasy aıasynda óńirdegi Kaztalov, Bókeı ordasy jáne Jánibek aýdandaryn oblys ortalyǵymen baılanystyratyn 245 km joldy salý mindeti turǵan bolatyn.
Atalǵan joldyń 2019-2022 jyldary, ıaǵnı 4 jyldyń ishinde 125 kılometri aıaqtalǵan bolatyn. 2023 jyly –104 kılometri, 2024 jyly — qalǵan 16 kılometri salynyp bitti.
Oblys ortalyǵynan 500 shaqyrym jerde ornalasqan Jánibek aýdanynyń turǵyndary úshin bıylǵy jyl qýanyshty jańalyqqa toly boldy. Aýdanǵa aparatyn joldyń qurylysy tolyqtaı aıaqtaldy. Talaı jyl jol qıyndyǵyn kórgen turǵyndar búginde oblys ortalyǵyna esh qıyndyqsyz qatynaıdy.
— Buryndary oblys ortalyǵyna qatynaý úshin kóp ýaqytymyzdy joǵaltatynbyz. Bıyl joldyń qurylysy tolyqtaı aıaqtalyp, halyq ıgiligine berildi. Bul aýdanymyzdyń ekonomıkalyq damýyna úlken áser etedi. Jol salyp berýge qoldaý bildirgen Prezıdentimiz Qasym-Jomart Toqaevqa alǵysymyzdy bildiremiz, — dep atap ótti Jánibek aýdanynyń turǵyny Beket Álipqalıev.
Eske salsaq, budan buryn BQO-da jańa medıtsınalyq pýnkt paıdalanýǵa berilgeni habarlandy.