Batys Qazaqstan oblysynda Dombyra kúni aıasynda 100-den astam is-shara ótti
ASTANA. KAZINFORM — Shilde aıynyń alǵashqy jeksenbisinde Batys Qazaqstan oblysy búkil elmen birge Ulttyq dombyra kúnin atap ótýde. Merekelik is-sharalar oblystyń barlyq 12 aýdanynda jáne Oral qalasynda uıymdastyrylyp, myńdaǵan turǵynnyń basyn qosty.
Baǵdarlama aıasynda kontsertter, shyǵarmashylyq aktsııalar, dombyrashylar baıqaýy, ulttyq sport túrlerinen jarystar, marafondar, kórmeler jáne aýqymdy fleshmobtar ótkizilgen.
Tańerteńnen bastap merekelik kóńil kúı qalalar men aýyldardyń ortalyq alańdarynda, mádenıet úılerinde, saıabaqtarda jáne qoǵamdyq keńistikterde sezilýde. Munda Qurmanǵazy, Dáýletkereı, Dına Nurpeıisova, Qazanǵap syndy uly kúıshi-kompozıtorlardyń máńgilik kúıleri oryndaldy.
Bıyl balalar men jastardyń qatysýyna erekshe kóńil bólindi. Máselen, Bórli aýdanynda mýzyka mektepteri men shyǵarmashylyq úıirmelerdiń 300-ge jýyq tárbıelenýshisi qatysqan aýqymdy fleshmob uıymdastyryldy. Jas dombyrashylar qazaqtyń áıgili kúılerin bir mezette oryndap, ulttyq ónerdiń sabaqtastyǵy men dástúrdiń urpaqtan-urpaqqa jalǵasyp kele jatqanyn kórsetti.
Merekelik sharalar kontserttik alańdarmen ǵana shektelgen joq. Oral qalasynda qoǵamdyq kólik te erekshe shyǵarmashylyq alańǵa aınaldy. Qalalyq avtobýstarda mýzyka mektepteriniń tárbıelenýshileri jolaýshylarǵa arnap dombyrada qazaqtyń belgili kúılerin oryndap, jol ústinde erekshe merekelik atmosfera syılady. Kútpegen mýzykalyq tartý qala turǵyndarynyń ystyq yqylasyna bólenip, jolaýshylar jas ónerpazdarǵa qol soǵyp, olardyń ónerin beınejazbaǵa túsirip, tanys kúılerdi birge yńyldap otyrdy.
Uıymdastyrýshylardyń aıtýynsha, Ulttyq dombyra kúniniń basty maqsaty — qazaq halqynyń baı mýzykalyq murasyn saqtaý, ulttyq ónerdi dáripteý jáne dástúrli kúı ónerine degen súıispenshilikti jas urpaqqa jetkizý. Sondyqtan dástúrli kontserttik baǵdarlamalar fleshmobtarmen, shyǵarmashylyq aktsııalarmen, ınteraktıvti alańdarmen jáne ashyq aspan astyndaǵy óner kórsetýlermen tolyqtyryldy.
Merekeniń sharyqtaý shegi keshki ýaqytta Oral qalasynda ótetin «Dombyra — dáýir úni» atty mýzykalyq marafon bolmaq. Saltanatty sharaǵa oblys basshylyǵy qatysady. Merekelik keshte Dáýletkereı atyndaǵy qazaq halyq aspaptar orkestri, óńirdiń belgili ónerpazdary men shyǵarmashylyq ujymdary óner kórsetedi. Kesh sońynda qatysýshylar qazaqtyń áıgili kúılerin birlese oryndap, ulttyq muraǵa degen qurmet pen urpaqtar sabaqtastyǵyn pash etedi.
Oral qalasynyń turǵyny Erlan Saǵyndyqovtyń aıtýynsha, Ulttyq dombyra kúni búginde túrli býyn ókilderin biriktiretin erekshe merekege aınalǵan.
— Dombyra — jaı ǵana mýzykalyq aspap emes. Ol — halqymyzdyń tarıhy, mádenıeti men ulttyq rýhynyń sımvoly. Balalardyń dombyrany erekshe yqylaspen oryndap jatqanyn kórgende, ulttyq dástúrimizdiń jalǵasyp kele jatqanyn sezinesiń. Osyndaı merekeler jastardyń óz tamyryna degen qurmetin arttyryp, mádenı muramyzdy baǵalaýǵa tárbıeleıdi, — deıdi ol.
Jyl saıyn Ulttyq dombyra kúni elimizdegi eń aýqymdy mádenı merekelerdiń birine aınalyp keledi. Bıyl da Batys Qazaqstan oblysynda uıymdastyrylǵan merekelik baǵdarlama ulttyq mýzyka men mádenıetke degen qyzyǵýshylyqtyń artyp kele jatqanyn aıqyn kórsetip, óńir turǵyndaryn qazaq halqynyń rýhanı murasyn aıshyqtaıtyn qasıetti dombyranyń tóńiregine toptastyrdy.
