Batys Qazaqstan oblysynda aýyr sanattaǵy mal urlyǵy kóbeıdi
ORAL. KAZINFORM — Batys Qazaqstan oblysynda bıylǵy alty aıda 28 mal urlyǵy tirkelgen.
BQO polıtsııa departamentiniń asa mańyzdy ister jónindegi aǵa jedel ýákili, polıtsııa maıory Asylbek Bıǵazıevtiń málim etkenindeı, sonyń ishinde 24-i nemese 85,7 paıyzy boıynsha mal erkin jaıylymnan áketilgen.
Asylbek Maqsotulynyń sózine qaraǵanda, qabyldanyp jatqan is-sharalardyń nátıjesinde mal urlyǵy ótken jylǵydan 3,4 paıyzǵa tómendedi, ashylý deńgeıi — 81,8 paıyz.
Alaıda aýyr sanattaǵy mal urlyǵy 54,5 paıyzǵa (11-den 17-ge) ósip otyr. Munyń ashylý kórsetkishi birqalypty — 80 paıyz.
— Qoldy bolǵan 191 maldyń 50-i nemese 26,2 paıyzy ıelerine qaıtaryldy. Statıstıkalyq málimetke súıenetin bolsaq, 2025 jyly jaz kezinde 18 mal urlyǵy tirkelse, kúz aılarynda 36-ǵa jetken. Maldyń erkin jaıylymnan urlanýy turǵyndardyń nemquraılylyǵyn, úı janýarlarynyń baǵymsyz júretinin kórsetedi, — deıdi Asylbek Bıǵazıev.
Onyń aıtýynsha, ótken jyldyń qazan aıynda Kaztalov aýdanynda 4 adamnan quralǵan qylmystyq top ustalǵan edi. Olardyń 65 bas mal urlyǵyna qatysy bar ekendigi anyqtalyp, qylmystyq is 7 epızod boıynsha sotta qaralyp jatyr.
Sol sekildi bıylǵy qańtar aıynda Jańaqala aýdanynda 2 adamdyq toptyń 7 bas iri qarany qoradan urlaǵany belgili boldy. Bular 5 jylǵa shartty merzimge sottaldy. Naýryz aıynda Bókeı ordasy aýdanynda eki adamnyń 7 bas jylqyny qoldy etkeni anyqtalyp, olar da 5 jyl shartty jazaǵa kesildi.
Oǵan qosa Jańaqala aýdanynda 2 bas iri qarany urlaǵany úshin 4 adamnan turatyn toptyń isi sotta qaralyp jatyr.
Eske sala keteıik, budan buryn Qazaqstannyń batysynda iri esirtki arnasynyń joly kesilgenin jazǵan edik.
