Batys Qazaqstan oblysynda ádep normasyn buzǵan aýyl ákimi sógis aldy
ORAL. KAZINFORM — QR Memlekettik qyzmet isteri jónindegi agenttigi BQO boıynsha ádep keńesiniń kezekti otyrysynda memlekettik qyzmetshilerdiń tártiptik isteri qaraldy.
Otyrys barysynda málim bolǵanyndaı, QR Memlekettik qyzmet isteri jónindegi agenttiginiń BQO boıynsha departamentine Báıterek aýdany Rýbejın aýyldyq okrýginiń ákimi Arman Jumaǵalıevtiń ústinen aýyl turǵyny aryz túsirgen.
Aryz ıesi WhatsApp messendjerindegi jazbalar men dybystyq habarlamalardy qosa usynǵan. Ekeýara áńgime kezinde aýyl ákimi Ádep kodeksiniń talaptaryn saqtamaǵan.
Ádep jónindegi keńes músheleri A.Jumaǵalıevke sógis túrindegi tártiptik jaza berý týraly qorytyndyǵa keldi. Aýyl ákimi bul sheshimmen kelispeıtindigin bildirip, sotqa shaǵymdanatyndyǵyn jetkizdi.
Sol sekildi BQO memlekettik sáýlet-qurylys baqylaýy basqarmasynyń basshysy Álibek Antazıev qyzmetkermen qarym-qatynas barysynda ádep normasyn buzýǵa jol bergen. Oǵan eskertý túrindegi tártiptik jaza berý týraly usynys jasaldy.
Departament basshysy, ádep jónindegi keńes tóraǵasy Murat Baısalovtyń aıtýynsha, atalǵan adamdardyń teris qylyqqa barǵany tekserý materıaldarymen rastaldy.
— Memlekettik qyzmetshiler tártiptik jaza alǵan kezde bul olardyń qyzmetin baǵalaýǵa áser etedi. Mundaı kezde syıaqy berýden bas tartylady. Eger sol jaza alynbaǵan ýaqytta qaıtadan teris qylyqqa jol berse, odan da qatań jaýapkershilikke tartylady, — dedi M.Baısalov.
Eske sala keteıik, budan buryn BQO-da balaǵat sóz aıtqan ákimdiktiń apparat basshysy qatań sógis alǵanyn jazǵan edik.