Batys Qazaqstan oblysynda 30 mekteptiń qurylysy júrgiziledi

ORAL. KAZINFORM – Batys Qazaqstan oblysynda bıyl 30 mekteptiń qurylysy júrgiziletin bolady.

BQO ákimi Narıman Tóreǵalıevtiń aıtýynsha, sonyń 18-i – jaıly mektep, 10-y – shaǵyn mektepter. Oǵan qosa Oral qalasynda №31 jáne №8 mektep salynady.

«Sonymen qatar 2024 jyly oblysta 5 bilim berý nysany kúrdeli jóndeýden ótkizilmek. Sonyń bireýi – Jańaqala aýdany Karmanov mektep-balabaqsha-ıaslı kesheni «Aýyl – el besigi» baǵdarlamasy aıasynda retke keltirilmek. Qalǵan tórteýi – Oraldaǵy daryndy balalarǵa arnalǵan S.Seıfýllın atyndaǵy №11 oblystyq mamandandyrylǵan mektep-lıtseı ınternaty, D.Nurpeıisova atyndaǵy balalar mýzyka mektebi, №9 jáne №17 mektepter «QPO b.v.» kompanııasynyń áleýmettik jáne ınfraqurylymdyq jobalary esebinen qaıta jóndelmek. Sondaı-aq 62 aýyl mektebin 160 qazirgi zamanǵy kabınettermen, jıhazdarmen materıaldyq-tehnıkalyq bazasyn nyǵaıtýǵa 2,6 mlrd teńge bólindi», - dedi óńir basshysy. 

Jalpy, ákimniń málimeti boıynsha Prezıdenttiń saılaýaldy baǵdarlamasyn júzege asyrý maqsatynda oblysta bilim berý salasyn damytýǵa 37 mlrd teńge qaraldy. Onyń ishinde apatty jaǵdaıdaǵy mektepterdiń, sonymen birge úsh aýysymdy oqytý, oqýshy oryn tapshylyǵy máselelerin túbegeıli sheshý úshin ótken jyly 17 mekteptiń qurylysy aıaqtalyp, paıdalanýǵa berildi. Bul mektepter 2 178 oqýshyǵa laıyqtalǵan. 

Mektepterde oqýshylarǵa jaıly jáne qaýipsiz jaǵdaı jasaý úshin 2,3 mlrd teńgege 114 zamanaýı pándik kabınetter jabdyqtalyp, 62 aýyldyq mektepke qajetti quraldar men jıhaz alyndy. Alty mektepti kúrdeli jóndeýge 2,5 mlrd teńge bólinse, sonyń tórteýinde jumystar aıaqtaldy.

Eske sala keteıik, budan buryn jas kóshbasshynyń muǵalim bilim-biligi, barlyq is-qımylymen ózgelerge úlgi bola bilýi kerek ekeni týraly aıtqanyn jazǵan bolatynbyz.