Batys Qazaqstan oblysynda 26 adam koronavırýs juqtyrdy

ORAL. KAZINFORM — Batys Qazaqstan oblysynda jyl basynan beri 26 adam koronavırýs dertin juqtyrdy.

BQO sanıtarııalyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda málim etkenindeı, sonyń 21-i qańtar, beseýi aqpan aıynda tirkeldi. 

Onyń sózine qaraǵanda, solardyń 8-i júkti áıelder bolsa, 9-y — 14 jasqa deıingi balalar. 18 adam aýrýhanada em alsa, sonyń 8-i — júkti áıelder.

«Sekvenırleý maqsatynda Astana qalasyndaǵy molekýlıarly-genetıkalyq zerthanaǵa 4 synama joldandy. Nátıjesi keıin belgili bolady» dedi M.Aryspaev.

Departament basshysynyń aıtýynsha, jiti respıratorlyq vırýstyq ınfektsııalar (JRVI) boıynsha ótken epıdemıologııalyq maýsymmen salystyrǵanda, aýrýshańdyq 60 paıyzǵa ósti. 1 qazannan beri 126 795 adam aýyrsa, sonyń 81 686-sy — 14 jasqa deıingi balalar. 

Sonymen qatar 82 adam tumaýmen syrqattansa, sonyń 28-i — 14 jasqa deıingi balalar, 24-i — júkti áıelder.

Oblysta sondaı-aq qyzylsha boıynsha epıdemıologııalyq jaǵdaı qolaısyz dep sıpattalady. Kúni búginge deıin 255 adam qyzylsha juqtyrǵan. Aýyrǵandardyń 89,3 paıyzy — ekpe almaǵandar.

Óńirde 12 nysanǵa medıtsınalyq baqylaý ornatylsa, sonyń altaýy — mektep, úsheýi — balabaqshalar. 

«Qazaqstan halqynyń arasynda ınfektsııalyq aýrýlardyń (qyzylsha, COVID-19 koronavırýs ınfektsııasy, tumaý jáne basqa da jiti respıratorlyq vırýstyq ınfektsııalar) taralýynyń aldyn alý maqsatynda 8 aqpannan bastap „Aýa-tamshy joly arqyly beriletin ınfektsııalyq aýrýlardyń taralýynyń aldyn alý jónindegi profılaktıkalyq sharalardy kúsheıtý týraly“ № 2 qaýly kúshine endi. Soǵan sáıkes medıtsınalyq uıymdarda personaldyń jáne kelýshilerdiń medıtsınalyq maska paıdalanýy, antıseptıktiń bolýy qamtamasyz etilýi mindetteldi. Halyq kóp jınalatyn jerlerde (áýejaılar, temirjol vokzaldary, avtovokzaldar, bazarlar, saýda-oıyn-saýyq ortalyqtary, saýda úıleri, teatrlar, kınoteatrlar, HQO, bankter jáne basqa), kóliktiń barlyq túrinde (qoǵamdyq kólik, áýe, temir jol kóligi) medıtsınalyq nemese matadan tigilgen maskany paıdalanýǵa usynym beriledi» dedi M.Aryspaev.

Eske sala keteıik, budan buryn Batys Qazaqstanda qyzylshamen aýyrǵandar sany 200-den asyp ketkenin jazǵan bolatynbyz.