Batys Qazaqstan oblysynda 25 adamnyń qyzylshamen aýyrǵany rastaldy
ORAL. KAZINFORM – Batys Qazaqstan oblysynda bıylǵy 1 qańtar – 3 aqpan aralyǵynda 29 adam qyzylshamen aýyrdy degen kúdikpen tirkeldi.
BQO sanıtarııalyq-epıdemıologııalyq baqylaý departamentiniń basshysy Dınara Jańabergenovanyń málim etkenindeı, sonyń ishinde 25-i zerthanalyq jolmen rastaldy. Qalǵandary tekserilip jatyr.
Dınara Oljabaıqyzynyń sózine qaraǵanda, sonyń 16-sy – Oral qalasy, tórteýi – Bórli, tórteýi – Báıterek, bireýi Kaztalov aýdanynyń úlesine tıedi.
– Syrqattanǵandardyń 24-i – 14 jasqa deıingi balalar. Sondaı-aq ekeýi – bir jasqa tolmaǵandar. 16-17 jastaǵylar – 2, eresekter arasynda – 1 adam. Qyzylsha – jedel juqpaly aýrý. Onymen aýyrǵan kezde dene temperatýrasy 38-40 °C-qa deıin kóterilip, jalpy ıntoksıkatsııaǵa ulasyp, kózdiń shyryshty qabyǵy, muryn-jutqynshaq jáne joǵary tynys joldary qabynady. Sondaı-aq bórtpeler paıda bolyp, jalpy álsizdik, bas aýrýy, tábettiń tómendeýi, uıqynyń buzylýy baıqalady, - dedi D. Jańabergenova.
Onyń aıtýynsha, ınfektsııanyń kózi – naýqas adam. Vırýs aýa-tamshyly jolmen taralady: túshkirý, jótelý, sóılesý kezinde bólinetin silekeı tamshylary arqyly juǵady. Aýa aǵynymen vırýs edáýir qashyqtyqqa taralýy múmkin. Qyzylshamen aýyrǵan naýqas bolǵan úı-jaıdyń aýasymen tynys alý kezinde de juqtyrý qaýpi bar. Eger adam buryn qyzylshamen aýyrmaǵan jáne osy ınfektsııaǵa qarsy egilmegen bolsa, naýqaspen baılanysta bolǵan jaǵdaıda juqtyrý qaýpi 100 paıyzǵa jýyq.
Mamannyń málimdeýinshe, qyzylsha kezinde aýyr asqynýlar bolýy múmkin. Buǵan ókpeniń qabynýy (pnevmonııa), ortańǵy qulaqtyń qabynýy (otıt), keıbir jaǵdaılarda mıdyń qabynýy (entsefalıt) jatady. Qyzylshamen aýyryp jazylǵannan keıin 2 aıǵa deıin ımmýnıtettiń tómendeýi baıqalatynyn eskerý qajet. Osy kezeńde bala jıi sýyq tııý nemese vırýstyq aýrýlarmen aýyrýy múmkin, sondyqtan ony shamadan tys júktemeden jáne múmkindiginshe naýqas balalarmen qarym-qatynastan qorǵaý usynylady.
– Aýrýdan senimdi qorǵanýdyń jalǵyz joly – Ulttyq profılaktıkalyq ekpeler kúntizbesine engizilgen qyzylshaǵa qarsy vaktsınatsııa. Sondyqtan ata-analar balalarynyń qyzylshaǵa qarsy egilgen-egilmegenin tekserip, vaktsınatsııa bolmaǵan jaǵdaıda profılaktıkalyq ekpe alý qajet. Aýrýdyń alǵashqy belgileri baıqalǵan boıda dereý dárigerge qaralyp, tekserýden ótý kerek. Dárigerdiń barlyq nusqaýyn oryndap, barlyq saqtyq, aldyn alý sharalaryn umytpaý mańyzdy, - dep qosty departament basshysy.
Eske sala keteıik, budan buryn mamannyń tumaýdyń sońy ólim-jitimge soqtyrýy múmkin ekeni jóninde aıtqanyn jazǵan edik.