Batys Qazaqstan oblysynda 2 180 tonna gýmanıtarlyq kómek kórsetildi

ORAL. KAZINFORM –  Batys Qazaqstan oblysynda sý tasqynyna baılanysty qıyndyqqa tap bolǵandarǵa jan-jaqty qoldaý kórsetilip keledi.

Tótenshe jaǵdaıǵa tap bolǵan oblys jurtshylyǵyna erikti túrde kórsetiletin gýmanıtarlyq kómekti jáne qarjylaı kómekti qabyldaý, saqtaý jáne ony taratyp berý jónindegi komıssııa tóraǵasy Erbol Salyqovtyń óńirlik kommýnıkatsııalar qyzmeti alańynda ótken brıfıngte málim etkenindeı, ıgi bastamany oblystyq máslıhattyń depýtattary, belgili kásipkerler, iri kompanııalar, otandastarymyz birden qoldady.

Erbol Ǵumarulynyń sózine qaraǵanda, óńirde tótenshe jaǵdaı jarııalanǵannan keıin oblys ákiminiń 5 sáýirdegi ókimimen atalǵan komıssııa quryldy.

Komıssııa qurylǵan kúnnen bastap respýblıkanyń ózge óńirlerinen, kórshiles memleketterden gýmanıtarlyq jáne qaıyrymdylyq kómekter kelip jatyr. Sonyń ishinde Astana, Almaty, Shymkent, Túrkistan, Balqash qalalarynan, Jetisý, Almaty, Túrkistan, Qyzylorda oblystarynan, baýyrlas Qyrǵyzstan, Ózbekstan, Tájikstan, Daǵystan respýblıkalarynan jetkizilgen gýmanıtarlyq kómekti aıtýǵa bolady. Sondaı-aq elimizdegi «BIZBIRGEMIZ», «ASAR UME», «Qaracet ENGINEERING», «Dauletten» qaıyrymdylyq qorlary, QR Prezıdenti janyndaǵy Áıelder isteri jáne otbasylyq demografııalyq saıasat týraly Ulttyq komıssııa jáne basqa partııalar, qoǵamdyq uıymdar belsendi túrde qolushyn sozdy.

«5 sáýirden bastap oblysqa 2 180 tonna gýmanıtarlyq kómek kelse, sonyń 1 040 tonnasy – azyq-túlik, 772 tonnasy – qurylys materıaldary, 360 tonnasy – turmystyq, gıgıenalyq zattar, tósek-jabdyqtar, qaıyqtar, quraldar, 8 tonnasy – dári-dármek, medıtsınalyq jabdyqtar. 1 420 tonnasy oblystyq shtab taratyldy. 10 500 otbasyna azyq-túlik sebetteri úlestirildi. Oblystyq komıssııanyń sheshimine sáıkes Oral qalasy, Bórli, Terekti, Syrym, Qaratóbe, Báıterek, Aqjaıyq aýdandary komıssııalaryna jáne BQO tótenshe jaǵdaılar departamentiniń jedel qutqarý jasaǵyna, BQO Polıtsııa departamentine gýmanıtarlyq kómek berildi», - dedi E.Salyqov.

Onyń aıtýynsha, BQO boıynsha qarjylaı kómekti qabyldaý, taratý boıynsha «Aqjaıyq» jeke qory belgilendi. Qazirgi ýaqytta qorǵa 685 jeke jáne zańdy tulǵadan 517 mln teńge qarajat tústi.

Eske sala keteıik, budan buryn BQO-da shyǵynǵa ushyraǵan 1 200-ge jýyq mal basy úshin ótemaqy tolyqtaı tólengenin jazǵan bolatynbyz.